Tok beslag i softgun

Laurdag kveld dukka politiet opp i Strandvik. Der stilte dei seg opp for å gjennomføra promillekontroll.

– Det var roleg og fint der, opplyser politistasjonssjef Terje Sperrevik.

På vel ein time, var det ikkje akkurat flust av bilar på vegen i Strandvik.

– Av loggen ser det ut til at dei stoppa og sjekka tre førarar. Alt var i orden, fortel Sperrevik.

Fredag kveld gjennomførte Utrykkingspolitiet trafikkontroll på Lyseklostervegen.

Det opplyser politioverbetjent Atle Birkeland i ein e-post. Han skriv at det i 50-sona var ni førarar som køyrde for fort.

– Høgaste hastigheit var 66 km/t, skriv Birkeland.

På Osvegen i retning Vallaheiane nær Bjørkåsen, har eit kumlokk løsna og blitt borte vekk. Det er open kum.

Det melder Vegtrafikksentralen kl. 18.10.

Entreprenør er på veg. Men, ver obs!

E39 Liafjelltunnelen vart kl. 19.16 stengt på grunn av køyretøystans, men opna igjen kl. 19.21.

Det melde Vegtrafikksentralen.

Rundt klokka 20.30 laurdag kveld fekk politiet melding om at det blei skutt opp fyrverkeri i Hagavik.

Då politiet kom til staden var utøvarane borte. Politiet kom difor ikkie i kontakt med nokon i samband med hendinga, skriv politiet i Bjørnafjorden i ein e-post til Os & Fusaposten søndag morgon.

Litt etter klokka 20.00 laurdag, fekk politiet melding om "ring på spring" og sparking på dør litt utanfor Os sentrum.

Patruljen kom til staden, men traff ikkje dei som skal ha stått bak episoden korkje der eller i nærleiken, opplyser politiet i Bjørnafjorden i ein e-post til Os & Fusaposten søndag morgon.

Klokka 21.22 skriv Vegtrafikksentralen vest at Lyshorntunnelen på E39 er stengt i retning Os. Årsaka er eit vogntog med havari i køyrebanen.

Klokka 01.48, natt til laurdag, fekk politiet melding om feststøy frå ein privat adresse i Hagavik. Etter kvart kom det fleire meldingar frå staden og klokka 03.00 drog politiet til adressa og gav festdeltakarane pålegg om å holda ro.

– Det kom ikkje fleire meldingar om støy etter dette, opplyser politiet i Bjørnafjorden i ein e-post til Os & Fusaposten laurdag.

Elles fortel politiet om eit roleg siste døger i kommunen.

Klokka 11.30 fredag melder Vest politidistrikt om eit trafikkuhell på Halhjemsvegen. Ein bil skal ha køyrd på ein annan på Halhjemsvegen. Det er ikkje meldt om personskade.

110 Vest melder fredag morgon om ei trafikkulukke i Hagåstunnelen i Samnanger. Éin bil skal ha køyrt i fjellveggen. Naudetatar er kring kl 9 på veg til staden.

Brannvesenet fekk torsdag ettermiddag melding om eit forlatt bål på Edne i Lysefjorden.

- Brannmannskap er på staden og vurderer om bålet må sløkkjast, skriv 110 Vest på X.

Litt etter klokka 13 tysdag fekk politiet melding om ein motorsykkel med stor fart, høg lyd og nokre forbikøyringar som i fylgje meldar "ikkje var heilt heldige".

Føraren var ein mann i 60-åra, men det vart ikkje gjort nokre operative tiltak frå politiets side. Politiet hadde ikkje opplysningar om kor køyringa fann stad.

I halv fire-tida tysdag ettermiddag kontrollerte politiet ein kvinneleg bilist like ved Vallabrua. Kvinna blåste til 0 på alkometeret, men vert meld for køyring utan gyldig førarkort.

Tysdag ettermiddag gjennomførte politiet ein åtferdskontroll på Hatvikvegen. Ein førar fekk eit forenkla førelegg på 10.450 kroner for bruk av mobil under køyring.

Mellom "Tunet" og gravplassen i Os sentrum, står det konteinarar. Desse er for driftsavdelinga og ikkje minst dei som vitjar gravplassane. Men her er det også andre som får det for seg at det er greitt å kasta alt mogleg oppi, og sleppa turen til BIR i Kolskogen.

– Etter helga er det dumpa fleire syklar i konteinarane for grøntavfall. For oss er dette ekstraarbeid og ekstra kostnad dersom vi sjølv må betala for å levera det til avfallstasjonen, seier driftsleiar Bjørnafjorden kyrkjelege fellesråd, Kenneth Molland.

Det er ikkje første gongen at dei opplever dette, fortel Molland.

– Vi har funne "alt mogleg" oppi konteinarane. Spesielt etter helgane. Ja, vi kan låsa konteinarane, men då er vitsen med å ha dei der borte. Folk må jo kunna nytta dei til det dei faktisk er der for.

Kring klokka 9 måndag morgon, fekk politiet melding om ein motorsykkel som stod ved Lyse Kloster. Meldar skal ha lurt på om det hadde skjedd noko, eller om kanskje sykkelen var stolen.

– Politiet kontakta rett eigar, som sa at han hadde hatt problemer med køyretøyet og den ville blir henta/fjerna innan kort tid. Dersom sykkelen ikkje blir henta tysdag, vil politiet rekvirera bergingsbil, då køyretøyet står i ei møtelomme.

Måndag morgon var politiet på plass på ferjekaien på Halhjem. Det opplyser politioverbetjent Anne Lyssand i ein e-post. Der gjennomførte dei ruskontroll. I kontrollen skal dei ha sjekka 102 førarar, og politiet skal ikkje ha funne noko å reagera på.

Statens vegvesen hadde torsdag kontroll på Svegatjørn kontrollplass. 92 køyretøy vart kontrollert.

Dette vart resultatet:

Eitt firma hadde ikkje fått på plass nytt løyve i køyretøyet. Dette resulterte i et gebyr på 6.000 kroner og bruksforbod inntil nytt og gyldig løyve var på plass.

Éin førar måtte sikra lasten sin betre før vidare køyring.

Eitt køyretøy fekk teknisk mangel grunna manglande skjerming av hjul.

Eitt køyretøy fekk teknisk mangel grunna feil med lysutrustning.

Seks førarar blei kontrollerte på køyre- og kviletid. Her blei det gitt 13 åtvaringar fordelt på fem førarar grunna mindre brot på reglementet.

Éin førar hadde eit større brot og vil få eit gebyr på 1000 kroner for dette.

- Ein annan førar hadde strekt strikken litt for langt, med tanke på kor lenge ein kan køyra utan helgekvile og vil bli politianmeldt for forholdet, skriv vegvesenet i ei pressemelding.

Eitt firma fekk eit gebyr på 8.000 kroner for ikkje å ha gyldig bombrikke-avtale.

- Alle køyretøy over 3.500 kilo som går i næring skal ha gyldig bombrikke, opplyser vegvesenet.

Torsdag kveld blei det, ifølgje politiet, observert ein ungdom på taket på Amfi.

- Ifølgje meldar skal guten ha gått rundt på taket i kring 20 minutt før han gjekk ned, sette seg i ein bil og køyrde frå staden. Ingen operative tiltak fra politiets side, opplyser Anne Lyssand, fagleiar for førebyggjande og politikontakt ved Bjørnafjorden politistasjon.