Småfly er meldt sakna. To personar skal ha vore om bord

Like før kl. 18 tysdag opplyste politiet at det skal ha vore to personar om bord i flyet. Politiet har vore i kontakt med pårørande til desse to.

Det gjekk føre seg søk etter det sakna småflyet heile tysdag kvelden, og store ressursar tok del – deriblant fleire helikopter, båtar og dykkarar.

– Framleis ingen teikn til flyet

Andreas Næsheim, redningsleiar ved Hovudredningssentralen Sør-Norge, fortalde tysdag ettermiddag at dei fekk melding frå tårnet på Flesland om eit småfly som hadde problem, og som forventa å måtta naudlanda i området Os/Søfteland. 

– Vi trur at dei har måtta naudlanda i dette området. Me søkjer no spesielt over Vinddalsvatnet, fortel Næsheim. 

Redningshelikopter frå SAR og Luftambulanse tok del i aksjonen. Redningshelikopter frå Florø var også på staden. Ambulanse, politi og brann var på staden med store styrkar. I tillegg deltok kring 90 frivillige.

Bergen Aero Klubb eig flyet: – Det var ei skuleflyging

Hovedredningssentralen koordinerte oppdraget i starten, før politiet tok over leiinga tysdag kveld.

Politiet opplyste kl. 16.38 at småflyet var meldt sakna. Dei stadfesta då at søk gjekk føre seg i området ved Vinddalsvatnet grunna observasjonar frå vitne.

– Helikopteret frå Florø ligg høgt og svevar sakte over her, medan det første leitar mykje lenger ned i terrenget, sa ein nabo på staden like før kl. 17.

Luftambulansen stod då plassert på eit jorde i starten av Vinddalsvegen. 

Vitne på staden fortalde at helikoptera framleis søkte i området og at det ikkje var teikn til at det var gjort funn av noko slag.

Os Aero Klubb skreiv tidleg tysdag kveld på Oppslagstavlo i Os, at småflyet som det vert leita etter, ikkje har tilknyting til deira klubb. 

– Alle våre fly står på bakken i dag, skreiv Ingebjørn Aasheim.

Os & Fusaposten har seinare fått stadfesta at flyet skal tilhøyra Bergen Aero Klubb.

Vel kl 21 tysdag kveld tok politiet avgjerda om å gå over frå livreddande søk til søk etter antatt omkomne.