Tidlegare Tippeliga-spelar klar for Lysekloster

Joshua Pritchard har bakgrunn frå blant anna Manchester Uniteds U19-lag, og erfaring frå Tippeligaen med Tromsø. No skal han vera med og redda Lyseklosters plass i 2. divisjon.

- Dette er første forsterking av fleire. Pritchard er speleklar no, men grunna influensa den siste tida, vil han nok stå over kampen mot Nest-Sotra på laurdag, seier Svein Kollen.

Når overgangsvindauget opnar 22. juli, vil nok fleire spelarar bli klare for munkane.

- Vi har ein engelskmann på prøvespel i desse dagar. Vi reknar med å forsterka med tre spelarar til, utanom Pritchard. Dette er naudsynt om vi skal klara å halda plassen, seier Kollen.

Forrykande skotfot

- Korleis kom de i kontakt med Pritchard?

- Kontakten skjedde via ein agent. Josh har solid erfaring frå høgt nivå, både i Tippeligaen, Europa League og U21 Premier League. Etter det vi veit var han sterkt ønska vidare i Tromsø då han var på utlån der, men han valte å heller ta sjansen heime i England, seier Kollen og held fram:

- Han er solid begge vegar på banen, og fungerer optimalt i ein 4-4-2-formasjon. Han er ein pasningssikker spelar, som også bidreg godt defensivt på banen. Han har òg ein forrykande skotfot.

Walisaren har kontrakt med Lysekloster ut sesongen.