Takla presset og gjekk til Bring-serien
Os jenter 16 måtte slå Ålgård for å ta seg til Bringserien. Det takla dei med bravur.
– Eg er sinnsjukt imponert over jentene. Dei måtte prestera på høgt nivå for å klara dette, for det var tøff motstand i alle kampane, fortel trenar Mia Torp Nielsen.
God start
I sitt første forsøk på å nå Bring-serien (landsserien for aldersbestemte handball-lag) vart Os jenter 16 nummeret for små. Dermed måtte dei ut i ekstrakvalik no i helga.
Artikkelen held fram under annonsen.
– Me vart nummer tre i pulja på Lillestrøm. Det gav oss ein ny sjanse til å kvalifisera oss. Den tok jentene godt vare på, må eg seia, konstaterer Torp Nielsen.
Helgas ekstrakvalik gjekk av stabelen i Steinsvik Arena på Haugalandet i Rogaland. I første kamp slo jentene vertslaget Haugalandet med fire mål. Deretter vart det ein tøff kamp mot bergensarane i BHK.
– BHK har eit svært godt lag, men me tapte berre med tre mål og sa oss nøgde med det, fortel trenaren.
Andreplass-finale
Etter å ha vunne ein og tapt ein kamp var det klart at søndagens oppgjer mot Ålgård blei vinn eller forsvinn.
– Ålgård hadde same resultat som oss frå laurdagen, så her stod andreplassen i pulja og billetten til Bringserien mellom oss og dei, fortel Mia.
– Og korleis takla jentene presset?
– Dei heva seg og spelte ein svært god kamp. Me hadde bra kontroll, leidde heile vegen og vann til slutt med fire mål, oppsummerer trenar Mia.
No blir det landsserie-spel alt frå og med helga 10.-11. november.
Artikkelen held fram under annonsen.
– Kor skal de spela?
– Det er ikkje klart kva pulje me kjem i, eller kvar første spelhelga går av stabelen. Men både jentene og me i trenarteamet er klare.
– Har du tid til dette då, Mia?
– Ja, no er eg nyleg operert og kan ikkje spela sjølv på lang tid, så då passar det bra å få konsentrera seg om trenarjobben, konstaterer Mia.
kenneth.svenningsen@osogfusa.no
