Sterk nysignering for Os OK
Os Orienteringsklubb veks seg stadig sterkare. Nyleg fekk Espen Rognsvåg med seg kameraten Håvard Austevoll.
Den nyutnemnde sportslege leiaren av Os Orienteringsklubb er glad for å ha styrka klubben med ein såpass sterk løpar.
- No gjeld det berre å læra han å orientera, skjemtar Rognsvåg.
Artikkelen held fram under annonsen.
- Åh, eg er no ikkje så verst til det heller. Eg slo no deg på siste etappen under Kompisstafetten på Gullbotn i helga, repliserer ein lattermild Austevoll.
Gode treningspartnarar
Kalandseidet-guten Austevoll har i mange år vore blant dei beste motbakkeløparane i sin årsklasse her på Vestlandet. I mange år har han trena mykje med fleire i Opptur Motbakkeklubb. I tillegg har han altså trena ein del med kompisen Espen.
- Det er kjekt å få Håvard med i klubben. Han kjem til å springa for oss ein gong i blant. Det set me stor pris på, seier Espen.
Men litt sporadisk vert det. Spesielt etter at Austevoll snart gjer siddis av seg.
- Eg har kjøpt leilegheit i Stavanger, men kjem nok ofte til å vera heimom i gamletraktene - ikkje minst for å konkurrera litt, smiler Austevoll.
Ung og eldre
I helga gjorde han ein fin debut då Os OK stilte med heile tre lag i Kompisstafetten på Gullbotn.
- Det var ein ny milepåle for klubben. Det var mange som var imponerte over at me stilte med så mange, fortel Tommy Sævareid i Os OK.
Totalt 15 var dei. Beste Os-lag vart nummer 17. Deretter følgde Os 2 på 24. plass, medan Os 3 vart nummer 26.
Artikkelen held fram under annonsen.
- Det var fem etappar på kvar utøvar, med 15 km i luftlinje og monaleg med høgdemetrar å klatra inne i skogen. Vinnarar vart Gular sitt førstelag, fortel Sævareid.
Han fortel at det var stor skilnad i alder på Os OK sin yngste og eldste deltakar.
- Det er 60 år mellom Nikolai Pontoppidan som er yngst og Rolf Nord som var eldstemann. Det må ein seia er eit bra aldersspenn, konstaterer Sævareid.
