Radioaktiv NM-helg

Radiobilgjengen på Nore Neset er kanskje ikkje verdast største, men truleg den mest entusiastiske.

Jostein Helland er 40 år og står i speakerbua dagen lang under helgas NM i radiocross på Nore Neset.

- Kva er din mentale alder?

- Eg veit ikkje. 18, kanskje? Nei, sikkert 10, ler han.

40-åringen har vore aktiv i miljøet lenge og har fått med seg fleire av ungane også. Mellom anna eldstedottera Alette på 10.

- Ha-ha, det er berre for ungane sin del at eg driv med dette, ler han sjølvironisk.

- Kva med kona, er ho like gira som deg og borna?

- Nei, ho ringer som regel midt i finalen og lurer på når eg kjem heim, sukkar han.

Godt gøymd

Den flotte racerbanen i miniatyr ligg godt gøymd bak kunstgraset like ved Nore Neset Aktivitetshus. Ei bane som er bygd mykje ved hjelp av KUP-midlar frå Os kommune.

Om lag 70 bilar frå Trondheim, Moss, Oslo, Sandefjord, Innherred, Bergen og altså Os, er på plass for å delta i helgas NM-konkurransar.

Det er forresten fyrste gongen at Bergen Modellbilklubb, som har sitt hovudanlegg på Nore Neset, arrangerer NM.

Vanvittig fart

Dei små racerbilane fyk rundt på bana i ein vanvittig fart. Rett som det er veltar dei. Heldigvis er det eigne vakter som står klar til å få dei på rett kjøl att.

- Det er vi som har den viktigaste jobben av alle, fleipar ein av dei, kledd i gul refleksvest.

- Sjølv ein nybegynnar kan koma seg rundt bana her, men skal du få skikkeleg fart på deg og i tillegg vinna, då krev det mykje øving, seier Helland.

Petter Solberg

Rally-legenda Petter Solberg er blant dei som har starta bilkarrieren med radiobilar. Det viser at dette er ein hobby ein ikkje skal kimsa av.

No manglar osingane berre ein plass å trena og leika seg på vinterstid.

- Før var vi i gymsalen på Os barneskule, men der får vi ikkje vera lenger. Så det er berre å ta kontakt om nokon har husrom, seier Helland.