På jakt etter dei rette typane

Fire unggutar prøvespelte for Lysekloster då dei kvit-blåe slo Gneist 3-1 tysdag kveld.

Medan stordingen Ken Joar Føyen, som mellom anna har spelt for Solid og Sogndal, har trena med Lysekloster eit par veker, fekk Ole Kristian Rødhal frå Kristansund, Thomas Eriksen Aarsund frå Brattvåg og Velco frå Serbeia sitt første møte med Lysekloster-spelarane då dei entra banen i treningskampen mot Gneist. Alle fire klarte seg bra, men ingen utmerkte seg særskilt.

- Det er vanskeleg å visa seg sånn veldig fram i slike treningskampar, men me fekk eit ok inntrykk av dei alle. Om det blir kontrakt på nokon av dei står att og sjå. Dei vil få svar innan relativt kort tid, seier Lysekloster-trenar, Ørjan Sandal.

Brukandes kamp

Lysekloster hadde berre spelt ein treningskamp før heimeoppgjeret mot Gneist tysdag kveld. Den enda med 1-3-tap for Nest-Sotra.

Denne gong vart det same resultat, berre med positivt fortegn for lysekostar-gutane.

- Me vann 3-1 etter ein variabel kamp. Me starta veldig bra og tok leiinga alt etter åtte minutt. Deretter fall me litt nedpå før me la på til 2-0 før pause. Etter kvilen reduserte Gneist til 1-2, før me kom sterkare mot slutten, skapte ein del bra spel og fekk 3-1 etter mål av Ola Sjømæling, oppsummerer Sandal.

Dei to andre måla til Lysekloster vart sett inn av Aleksander Andersen og Sigve Rørstad.

Skal ha 3-4 spelarar

Leiinga for A-laget på Lysekloster har bestemt seg for å signa 3-4 nye spelarar før debuten i 2. divisjon. At nokon av desse er blant dei fire som fekk spela mot Gneist er ikkje usansynleg, men det tydar ikkje at laget set strek for prøvespel denne vinteren.

- Me kjem til å ha fleire på prøvespel framover. Ettersom me berre skal ha 3-4 nye, må me vera heilt sikre på at dei me signerer er dei rette typane både kva gjeld ferdigheiter, haldningar og i høve til laget, seier Sandal.

Alt komande veke får dei ein ny spelar på vitjing.

- Det er ein kroat frå Fyllingsdalen, seier ein løyndomsfull Sandal.

Ny treningskamp vert det først neste torsdag. Då møter Lysekloster Vestsiden/Askøy i Vestlandshallen.