Os Turn arrangerer Futsal-turnering

Laurdag og søndag 17. -18.desember inviterer Os Turn Fotball til futsal-cup i Oshallen.

Opninga av cupen vert eit reint kveldsarrangement laurdagen.

- Det blir kveldsspeling laurdag og sluttspel på søndagen, fortel dagleg leiar i Os Turn, Endre Brenne.

Førjulscupen i futsal vart første gong arrangert i fjor og var ein stor suksess.

- Det er mange som synest det er kjekt å starta juleferien med litt fotballcup - nett slik me hugsar det frå då me spelte aldersbestemt fotball, seier Brenne.

Sjølv stiller han med ein god blanding av gamle Fjorda-folk.

- Eg samlar ein gjeng av folk frå gamlebygda mi Strandebarm og nabokommunane Norheimsund og Øystese, fortel Brenne.

Maks 24 lag

I fjor stilte 16 lag. I år håpar arrangøren på endå fleire.

- Eg har vore i kontakt med Nore Neset og Søfteland sine A-lag. Dei trudde dei kom til å stilla med lag, seier Branne.

Han oppfordrar andre interesserte om å vera om seg med å melda på lag.

- For at me skal få arrangementet i hamn set me ein grense på 24 lag totalt.

- Kvart lag kan ha ti spelarar. Det er ikkje noko tak for kor mange aktive spelarar ein kan ha med, fortel Brenne, som har fleire års erfaring frå 1. divisjons-futsal-spel med Øystese.

- Jenter og gutar kan også spela på same lag, legg Brenne til.

Cupen vil bli spelt etter reglar sett opp av FIFA og Norges Futsalforbund.