Mr. Os sikra tre poeng

Os hamna under mot Vaulen i kveld, men ein sterk snuoperasjon med mål frå Marius Mikkelsen og Stian Lunde sikra tre nye bortepoeng.

Vaulen gjekk til pause med ein 1-0-leiing, etter det som i følgje rapportane var ein jamn førsteomgang. Målet kom om lag fem minutt før pause, etter at ein innnsvingar frå venstre vart ekspedert vidare i mål.

Etter kvilen tok Os initiativet i kampen, og var nære på utlikning ved fleire høve. Dei største sjansane fekk Tiago Ribeiro, som hadde eit frispark i tverrligger, og bomma på ballen på ope mål. Men målet sat langt inne i kveld. Då det først kom, var det ei perle signert Marius Mikkelsen. Hans første for sesongen var eit prosjektil rett i hjørnet frå 25 meter.

Då såg det ut til å gå mot uavgjort, men det ville ikkje Stian Lunde ha noko av. På overtid dukka målsniken opp i Vaulens 16-meter. Heimelagets keeper gav retur på eit skot, og Lunde var ikkje vond å be, og sikra tre poeng for Os.

- Heile laget stod fram

Os-trenar Hassan El Fakiri nemde tidlegare i dag at det kunne bli tøft å oppretthalda trykket og motivasjonen i laget ettersom dei ikkje har noko særleg å spela for lengre. Men det ser ikkje ut til å bli eit problem i dei siste rundane av årets sesong.

- I førsteomgang var det ingen god fotballkamp. Men etter kvilen var me der me skal vera. Me var offensive og aggresive, og skapte ein del målsjanser. Det var godt å snu kampen. Det gjer den fem timer lange turen heim att så mykje betre, seier El Fakiri.

Os-trenaren stod spelte ikkje i dag grunna lyskeproblemer.

- Eg har tatt ein pause no, så får me sjå kva som skjer framover, seier han.

- Vil du trekkja fram nokre spelarar etter snuoperasjonen?

- Heile laget. Alle saman stod på etter kvilen, seier Os-trenaren. 

 

Laget som starta: Frode Øvredal, Glenn Krossøy, Adrian Valle, Håkon Kvittingen, Endre Brenne, Rafael Villén, Marius Mikkelsen, Fabian Bødtker, Tiago Ribeiro, Sander Kvittingen og Stian Lunde.

Innbytarar med speletid: Anders Havsgård, Christoffer Hevrøy.