Lager futsalcup i Oshallen

Endre Brenne har spelt futsal i mange år for eit av vestlandets beste lag, Boca Juniors Bergen. No steller han i stand futsal-cup i bygda i regi av Os Fotball.

Brenne meiner det ligg eit uforløyst potensiale for sporten i Os.

- Futsal er veldig kjekt, men eg har ikkje opplevd det som ein stor sport i Os. I Bergen er det mykje større. Eg har trua på at dette kan bli populært også i Os, seier Os-spelaren, som også er spelarutviklar og marknadsansvarleg i Os Fotball.

For gutar og jenter

Førjulscupen i futsal går av stabelen i Oshallen siste laurdag før jul, og vil vera open for alle over 16 år. Påmeldinga starta tidlegare i veka. Fem lag har alt meldt seg på.

- Cupen er for både gutar og jenter. Det er ikkje mange krav me stiller til dei som ønskjer å vera med. Så lenge dei er over 16 år, og laget har fem spelarar, så er alt i orden. Det har heller ikkje noko å seia kor mange aktive fotballspelarar ein har på laget, seier Brenne.

Men det kan vera ein ide å ha med seg eit par innbytarar.

- Ein blir temmeleg køyrd etter nokre minutt på banen. Ein kan byta når ein vil, og det er ikkje grense for kor mange byte ein kan gjera i løpet av ein kamp, seier Brenne.

Lågt tyngdepunkt og kvikke bein

- Kva kjenneteiknar ein god futbal-spelar?

- Spelaren bør vera god ein mot ein, både til å koma seg forbi, og til å kunna stoppa motstandaren. Det er òg ein fordel å vera god med ball. Kjenneteiknet på ein god futsal-spelar er lågt tyngdepunkt og kvikke bein. Den type spelarar kjem ekstra godt til sin rett på ein futsalbane.

Påmeldinga er ope til eit par dagar før cupen startar, men det kan vera lurt å vera om seg.

- Me kan maks ha med 16 lag. For cupen skal avgjerast laurdag, seier Brenne.