Klart for 38. utgåve av Ulvenmarsjen
Seks standhaftige marsjdeltakarar har så langt gått samtlege Ulvenmarsjar. Til helga går dei truleg for 38. gong.
Det tynnast stadig ut i rekkene, men tre kvinner og tre menn kan framleis skryta av å ha gått samtlege Ulvenmarsjar sidan starten i 1979.
- Eg har ikkje høyrd noko anna enn at dei skal gå i år også. Eg reknar med at at både Barbra Nymark, Nina S. Sælen, Britt Eva Brurås, Ottar Skarstein, Otto Tysseland og John Hope fullfører sin 38. Ulvenmarsj i løpet av helga, seier primus motor for arrangørlaget Søfteland TIL, Erling Andersen.
Artikkelen held fram under annonsen.
Opp mot 500
Dei siste åra har deltakartalet lagt på i overkant av 400. I fjor gjekk 430.
- Målet for i år er å nærma oss 500 igjen, eit tal me vågar å håpa på dersom vêret er med oss.
- De har truffet litt leit med datoen dei siste åra. Korleis er det i år?
- I år unngår me i alle høve Bergen City Marathon og Skarvarennet, men lokale ting som fotballkampar og mini-cupar er verre å unngå. No på våren skjer det mykje uansett, seier Andersen.
Han håpar uansett at om folk er opptekne på laurdagen, så går dei Ulvenmarsjen søndagen, eller motsett.
- Me har fullt opplegg begge dagar som vanleg. Kring 20 frivillige står på kvar dag for å syta for at osingar og andre skal få høve til å gå den flotte 14 km lange turen rundt Skeie, seier Andersen.
