Klar for proffliv i Belgia

Anders Berntsen Mol har skrive under for den belgiske toppklubben Noliko Maaseik.

19-åringen frå Strandvik har dei siste tre åra gått på Topp Volley Norge-skulen i Sand. No er den høgreiste volleyballspelaren klar for utanlandseventyr i Belgia.

- Det kom svært overraskande på meg at eg skulle få denne sjansen som læregut i ein merittert klubb som Noliko Maaseik, men eg ser fram til å kunna utvikla meg endå meir som volleyballspelar i denne klubben, uttalar Strandvik-guten.

Nye trenarkrefter

19-åringen har fått med seg at klubben nyleg har signert den meritterte trenaren Daniel Catsellani.

- Både klubbskiftet og det å få trena under ein såpass erfaren og flink trenar triggar meg veldig, seier Anders.

Far og tidlegare trenar Kåre Mol, trur klubbskiftet vil gjera sonen godt.

- Eg ser mange positive sider ved denne overgangen. Anders vil ha godt av å få andre trenarkrefter som utfordrar han. Det at eg no blir frigjort frå trenar-rolla, kontra pappa-rolla vil vera godt for begge partar, fortel pappa Mol.

Han trur sonen også vil dra nytte av klubbskiftet i høve til sandvolleyball-satsinga.

- Det at Anders er tiltenkt ei rolle som kantspelar vil definitivt vera utviklande for han som beachvolley-spelar. Han kjem til å bli utfordra mykje kvar dag og vil veksa som volleyballspelar generelt, trur pappa Mol.

Sandvolleyball-EM

I september i fjor vart Anders og søskenbornet Mathias Berntsen EM-vinnarar for U20-spelarar i sandvolleyball.

Denne sesongen skal gutane på BeachvolleyVikings delta i U20-EM i Tyrkia og i U22-EM i Hellas litt seinare i sommar.