Herleg med heimekamp-runde

I fjor måtte HU-laget til Os spela alle serierundane i andre hallar. I helga fekk dei spela på heimebane igjen.

- Det er alltid ekstra moro å spela i Oshallen. Her har me fleire som heiar på oss, seier storskårar Magnar Moberg.

Kraftkaren med hestehalen har vore blant dei beste på HU-laget dei siste åra. Så også i Os-hallen no laurdag.

- Alle er gode, og alle yter full innsats, men Magnar har det vesle ekstra når det kjem til å skåra mål. Der er han veldig god, skryter trenar Grethe Søviknes.

Ho har leidd laget i over 20 år. Dei siste åra har ho hatt med seg Ina Christine Eide.

Presterar betre

Også keeper Caroline Drønen set pris på å spela i Oshallen.

- Me liker oss veldig godt her. Dessutan presterar ein gjerne litt ekstra på heimebane framfor vener og kjente på tribunen, smiler den erfarne ballstopparen i Osburet.

Os-laget fekk to kampar på heimebane denne helga. I første oppgjer mot Sandviken vann dei 5-4.

Målskårarar vart Magnar Moberg (4) og Liv Mette Jensen (1).

- Det var ein god kamp. Me var betre og vann fortent, oppsummerar Magnar.

- Men kampen vart avbroten av at ei jente på Sandviken fekk litt problem. Det var litt kjedeleg at me ikkje fekk spelt ferdig, supplerer keeper Caroline.

Knepent tap

I heimerunden i gullserien mangla Os-laget Rune Myrlid og Stig Øvreeide. Det fekk dei merka i andre og siste kamp for dagen.

- Då møtte me Lyngbø. Det vart ein tøff og hard kamp, der det stod 5-5 til pause. Etter kvilen drog Lyngbø dessverre frå og vann 12-9, fortel trenar Grethe Søviknes.

Målskårarar i den kampen vart Magnar Moberg (6), Janne Hatletveit (2) og Truls Strømme (1).

Neste runde i gullserien er laurdag 21. november. Då spelar dei gul-svarte i Sotra Arena.