Får kompisane med i V-cupen

Mykje talar for at Sverre Lunde Pedersen får begge treningskameratane sine frå Fana IL med i årets V-cup.

Halvtfusingen Håvard Holmefjord Lorentzen har vore med i V-cupen ei stund. Nytt av året er at 92-årgangens tredje Fana IL-gut, Sindre Henriksen, også ligg an til å få vera med ut i den store skeise-verda.

- Eg har trena med Håvard og Sindre sidan eg var 10 år. At me alle no kan hevda oss internasjonalt er ganske kult. Tre Fana IL-gutar på V-cup-landslaget lèt seg absolutt høyra, seier Sverre Lunde Pedersen.

Råsterke løp

Då «Os og Fusaposten» prata med osingen denne veka hadde han eit par dagar igjen av eit treningsopphald i tyske Inzell. Resultata han og Fana-gutane tek med seg heim er absolutt oppløftande.

- Dette var skeitesportens svar på skimønstringa på Beitostølen. Det var ikkje V-cup eller meisterskap, men deltakinga var enormt stor, fortel Sverre.

Han snakkar om sist helgs testløp.

- Med juniorar og seniorar var det sikkert 300 deltakarar.

Sverre gjekk tre råsterke løp. Osingen gjekk til topps både på 1.500 m (1,47,00) og på 5.000 m (6,22,3). Men aller mest gledeleg var det å persa på 1.000 m.

- Eg gjekk kilometer-løpet på 1,09,71. Det er ni tidelar raskare enn min gamle rekord, fortel ein svært nøgd Sverre.

Han legg til at det alltid er moro å lukkast når det er ting ein har jobba spesielt med.

- Heile forsesongen har eg jobba med å få opp maksfarten. Det ser det ut til at eg har lukkast med, seier han.

God nok for V-cupen

Når han kjem heim til Os på fredag vert det nær ei veke med trening i Os og på Slåtthaug. Deretter går turen til Sørmarka Arena i Stavanger der det er V-cup-uttaksløp frå fredag, til søndag.

- Sjølv er eg alt teken ut, men det blir artig å gå likevel. Dessutan blir det spennande å sjå om Sindre Henriksen klarer å kvalifisera seg. I Inzell gjekk han ein råsterk 1.500 m. Med tida 1,47,9 ville han truleg plassert seg midt i A-feltet i V-cupen. Dersom han går like bra i Stavanger, får han nok billett, seier Sverre.

Håvard Holmefjord Lorentzen satsar igjen mest på 1.000, men halvtfusingen vil også gå ein del 1.500 m-løp.

- Det som er kjekt i år er at alle V-cup-løpa går same plass. Det vil altså seia at sprintarane og mellomdistanse-løparane deltek på samme stemne som oss allroundarar. Dette trur eg vil slå positivt ut og syta for at det vert meir publikum, seier osingen.

V-cup i Stavanger

Nytt for sesongen er det at Stavanger også vert tildelt ei V-cup-helg.

- Det blir veldig moro. Hamar er fortreffeleg som meisterskaps-arena, men som V-cup-plass trur eg Sørmarka Arena vil vera heilt super. Stavanger er ein by som er kjent for å å samla godt med folk til store idrettsarrangement, dessutan vert det jo kortare veg for bergensarar og osingar, poengterer Sverre.

V-cupen i 2015/2016-sesongen startar som i forfjor med løp på det amerikanske kontinent. Opninga i år går i Calgary fredag 13. november.