- Endeleg har eg nådd målet mitt
Ariel Braathen er rørt og stolt over at ho i dag klarte landslagskravet. - No får eg reisa på høgdeopphald til Flagstaff, der mitt store idol Alexander Dale Oen trente, seier Braathen.
Søftelendingen opna knallsterkt på første distanse i Nordisk Meisterskap på heimebane i dag. På 100 meter bryst blei det ny norsk junior-rekord med ni tidelar. Tida 1.06.98 er også ei forbetring av hennar personlege rekord med om lag eit halvt sekund.
- Eg trudde eg var ferdig med å "persa" med fleire sekund, men eg er tydelegvis ikkje det, smiler Braathen.
Artikkelen held fram under annonsen.
Får ikkje sova
Då me snakka med Braathen, var ho heime på Søfteland for å slappa av før finalen på 100 meter bryst startar i 17.30-tida.
- Eg har prøvd å sova litt, men får det ikkje til. Eg trur det skal vera mogleg å persa nok ein gong i dag, for eg kjente at eg ikkje var heilt nøgd med 100-meteren tidlegare i dag. Eg kunne ikkje forstå at det var ny rekord då eg såg på tavla, seier Braathen og held fram:
- Eg må berre klara å fokusera på det eg skal, men det er vanskeleg å la vera å tenkja på at eg har nådd målet mitt.
- Må satsa mens eg er ung
I morgon venter 50 meter bryst, før 200 meter bryst går av stabelen søndag.
- Eg er framleis motivert og svolten, og kjem til å gjera mitt beste heile helga, seier Braathen.
I januar ventar som sagt tur til Flaggstaff. Kort tid etter ho er komen heim frå USA, skal ho kanskje over dammen igjen.
- Då er det klubben som reiser på leir i Florida, seier Braathen.
I mars vert det tur til Sierra Nevada med landslaget.
Artikkelen held fram under annonsen.
- Vidare har eg ikkje heilt oversikta på ståande fot. Eg er i alle fall kvalifisert til landslaget denne sesongen, altså til og med sommaren, seier Braathen.
- Går du ikkje på skulen, du?
- Jo, eg gjer jo eigentleg det. Me har snakka mykje om det heime, og er framleis ikkje heilt sikker på korleis me skal løysa dette, seier Braathen.
- Eg kjem til å få mykje fråvær, men det kjem ikkje til å stoppa meg frå å reisa. Eg må nesten nytta høve når eg er ung og sprek. Eg må satsa medan eg er ung, det er ikkje like lett når eg er 30 år gamal. Skule får eg berre ta opp når det passar, smiler Braathen.
