Drog inn 70.000 kroner på vellukka barnearrangement
Barnas dag på Kuventræ vart ein storsuksess laurdag. Os A-lag krona det heile med storsiger over Loddefjord.
– Dette var verkeleg eit vellukka konsept. Barnas dag-arrangementet er kome for å bli. Dette skal garantert bli ein tradisjon, seier dagleg leiar i Os Fotball, Endre Brenne.
Artig konsept
Det var Mats Cato Moldskred som kom med ideen til arrangmentet. Då han spelte for Kongsvinger hadde dei eit liknande arrangement der.
Artikkelen held fram under annonsen.
– Grunntanken er å få born og småbarnsfamiliar til arenaen. La dei mora seg der, samstundes som me får vist litt kva me driv med. Forhåpentlegvis rekrutterer me også nokre framtidige tilskodarar på denne måten, seier Brenne.
Han anslår at bortimot 900 var innom arrangementet i løpet av dagen.
– Det var full aktivitet og stor stemning. Takk vere mange støttespelarar hadde me mykje artige aktivitetar å tilby, fortel Brenne.
– Alle stilte gratis. Benjamin Bruarøy med boble-fotballen sin, Roar Wold med hoppeslott, Alexander Lindkvist med lasermålar for å måla kor fort ein spring og mange fleire. I tillegg må me takka Daniel Fagerlid Andreasson og hans 40 dansarar frå dansegruppa hans på Søre Neset som underheldt i pausen på kampen, fortel Brenne.
Innbringande dag
På A-lagets heimekamp mot Loddefjorde hadde Os Fotball 640 tilskodarar. For dei mange som fann vegen, var det gratis, men næringslivet sponsa billettane med litt over hundre kronar per bilett.
– Det var ein innbringande dag for oss på mange måtar. I kampen drog me heim tre viktige poeng, og frå «billettsalet» fekk me inn 70.000 kroner. Det er gode pengar for fotball-gruppa, seier Brenne.
Os spelte ein solid kamp og vann 6-0. Måla vart skåra av Marius Mikkelsen (2), Øystein Takle Eide, Torkel Hjertnes, Frode Storebø og Erik Kanestrøm.
kenneth.svenningsen@osogfusa.no
