Arrangerer sykkelritt i Fusa

Det er berre nokre veker til Strandvik Open. Nytt av året er at det blir arrangert sykkelritt i samband med turneringa.

Det er ikkje mange veker sidan proffsyklistar fauk gjennom Fusa i sykkelrittet Tour Des Fjords. No skal fusingane sjølv kasta seg på sykkelen.

- Det er fleire i komitéen som har vore med å arrangera liknande sykkelritt tidlegare. Det er stor sykkel-interesse i kommunen, blant anna i ein veldig aktiv sykkelklubb, og me ønskjer å spela vidare på den interessa, seier Stina Kvåle Bergesen, som er hovudansvarleg for Strandivk Open, Strandvik-løpet og sykkelrittet. Løypa startar i Eikelandsosen, med målgang på Hauge, og er om lag 25 kilometer lang. Rittet kjem ikkje til å verta marknadsført i stor grad.

- Me kjem ikkje til å marknadsføra i stor grad sidan det er første året me arrangerer. Det kjem til å gå på jungeltelegrafen, seier ho.

Påmeldinga er ikkje starta, då dei ikkje har fått lagt det ut på heimesida til Strandvik Open enno. - Eg veit ikkje eksakt kortid det vert mogleg, men med tida kan ein melda seg på på heimesida, seier Bergesen.

Heimesida blei hacka

Påmeldinga til volleyball-turneringa Strandvik Open er i gang. Der har arrangøren hatt litt trøbbel med heimesida som blei hacka, men no skal alt vera i orden.

- Trur de på ny deltakarrekord på nokre av aktivitetane?

- I alle fall på sykkelrittet, smiler Bergesen og legg til:

- Det er vanskeleg å seia, og det har mykje å seia korleis vêret blir. Det er først siste veka før volleyballturneringa at dei fleste melder seg på. På Strandvik-løpet er det påmelding ved oppmøte, og der har me hatt eit stabilt oppmøte dei siste åra, seier Bergesen.

Hanøy kjem attende

Speakeren, Erik Hanøy, kjem attende i år også. Han er ein kjend bergensk stemme frå radioen, og han har tidlegare vore speaker på Brann stadion. Etter kvart er han også blitt fast inventar på Strandvik Open.

- Eg veit ikkje kor mange år han har vore her. Me trivst godt med han, og han ser ut til å trivast i Strandvik. Han held ting saman, og syter for ein raud tråd gjennom dagen. Eg trur det vert første gang han dekkjer eit sykkelritt, men det trur eg han taklar heilt fint, seier Bergesen.