Slik held han VM-forma ved like

Sverre Lunde Pedersen er ikkje redd for å mista godforma etter VM-utladinga. Onsdag køyrde han tung intervalltrening opp Lyshornet.

Han gjekk truleg sitt livs løp då han glei inn til tida 6,15,08 og kapra bronse på 5.000 m i enkeltdistanse-VM sist laurdag. Denne veka var Sverre Lunde Pedersen tilbake i Os. Men å kvile på lauvbæra har han ikkje tid til. Dagane i Os gjekk med til tøffe treningsøkter og oppkøyring til dei to store siste happeningane for sesongen - allround-VM i Berlin (5.-6. mars) og V-cupfinale i Heerenveen helga etter.

- I tysdagens BA uttrykte din skadde lagkamerat, Sindre Henriksen, at han var glad for at sesongen var over. Korleis er det med deg? Er du sliten og snart klar for ferie?

- Nei, på ingen måte. Eg er trena for å stå sesongen fullt ut og gler meg veldig til dei to neste konkurransehelgane. Medaljane i enkeltdistane-VM gav meg både vilje og motivasjon til å kjempa om nye medaljar, seier Sverre med eit lurt smil.

Passande motbakke

Torsdag fekk me vera med VM-medaljøren på intervall-trening på grusvegen opp mot Lyshornet.

- Kvifor nett her? Kva er det som lokkar deg til nett desse bakkane?

- Dei er passe bratte, og frå botn til toppen brukar eg kring 10 minutt. Det er passe for ein intervall, seier Sverre.

Han starta dagen med å sykla frå heimen i idrettsvegen til Lyse Kloster. Turen tok han nøyaktig 16 minutt.

- Passe oppvarming før intervall-øktene, smiler ein treningsklar Sverre klar for hardare tak.

- Kor mange intervalløkter blir det opp bakken no?

- No køyrer eg fem på rappen. Kvar av dei skal syklast på under 10 minutt, så med nedfarten igjen vert det sånn kring ein time med trening.

- Kor hard er slike økter for deg?

- Eg ligg på kring 170 i puls og er rimeleg tett oppunder syrenivå, så det er bra tøft.

- Men heilt i kjellaren går du ikkje?

- Nei, berre nesten, ler Sverre.

Braut ein barriere

- Som vanleg er du i ferd med å avslutta sesongen betre enn du starta han, kva er du mest nøgd med så langt?

- Eg gjekk jo glipp av EM, så eg var rimeleg sugen på å gjera ein god figur i enkeltdistanse-VM. Opninga med VM-sølv på lagtempo var utruleg kjekt - veldig fin opptur for oss alle og ein herleg lagsiger. Men reint personleg var det sjølvsagt ekstra stort å ta VM-bronse på 5.000 m. Den jobben gjorde eg heilt åleine, seier Sverre.

- Du såg ikkje ut til å ha medaljesjansar då du gjekk 5.000 m i Stavanger?

- Nei, då var eg nok ikkje heilt i slag. Der tapte eg for Ted-Jan Bloemen. No i Kolomna slo eg han med to sekund. Det var ein herleg revansje, smiler 22-åringen.

- Det vart sagt at dette er din beste 5.000 m nokosinne. Er det det?

- Ja, det trur eg. Eg braut ein barriere då eg gjekk på 6,15 på ein bane i Europa. Tidlegare har eg som best lege på 6,19-6,20. Hadde eg gått på ei slik tid i Kolomna hadde eg blitt nummer sju, konstaterer osingen.

Ny medaljejakt

Men trass i suksessen i Russland føler Sverre på langt nær at han må forsvara noko i allround-VM. Han føler nok ein gong at han skal på jakt.

- Korkje VM-bronsen min frå allround i fjor eller bronsen min frå enkeltdistanse-VM kan nokon nokosinne ta frå meg. Difor ser eg ikkje på eit nytt VM som ein plass der eg skal forsvara noko. Tvert imot skal eg ut i ein ny jakt - ein ny jakt på ny medalje, forklarer Sverre.

- Kor sannsynleg er det at du lukkast også denne gongen?

- Eg har trua og er trygg på at eg skal klara halda forma ved like. I så måte bør sjansane vera gode, svarer Sverre.

Neste tysdag reiser han på samling i Inzell i Tyskland. Der skal han trena og gå nokre få testløp før turen etter kvart går til allround-VM i Sportforum-hallen i Berlin.