Real treffsikker rekrutt-trio

Rekruttane til Os Skyttarlag er i storform for tida. Blant dei beste er trioen Markus Johannesen, Kyrre Haugland og Loke Eide.

Førre helg var 13 rekruttar i aksjon på miniatyrskytebanen på Stend. Denne helga var dei ni som skaut på Bergen skyttarklubbb sin miniatyrbane på Melkeplassen. Begge gongane gjekk ein osing til topps.

- Me har ein veldig god generasjon med rekrutt-skyttarar for tida. Loke Eide, Markus Johannesen og Kyrre Haugland er blant dei mest treffsikre i desse dagar, fortel leiar for rekrutt-avdelinga til Os Skyttarlag, Anstein Eidsvik.

Dobbeltsiger til Os

På Stend var det Markus Johannesen som var best. Ungguten klinte til med 246 poeng på 25-skot-serien. Med det tok han sigeren i rekrutt-klassen.

- Det er ein rimeleg bra serie. Det er faktisk vanskelegare å treffa blink inne enn ute, så 246 er ein poengsum det står respekt av, seier Eidsvik.

I runden på Melkeplassen var det Kyrre Haugland som var best. I 35-skot-serein noterte han seg for 341 poeng. Loke Eide sikra seg andreplass og dobbelt-siger til Os med sine 340 poeng.

Med Kyrres siger på Melkeplassen har rekruttane til Os stått øvst på resultatlista 15 gongar så langt denne sesongen. I tillegg vart som kjent Sofie Evensen noregsmeister i rekruttklassen under landsskyttarstemnet på Lesja i sommar.

Bussar til Åsane

Alt i morgon (tysdag) er det ny konkurranse for ein del av skyttarane frå Os. Då startar andre runde av Os Karusellen. Utover veka skal kring 300 skyttarar i aksjon på miniatyrskytingsanlegget i Skyttarhuset på Ulven.

Seinare i veka har Åsane og Hordevik stemne i Jonahålo.

- Der har me planar om å stilla med mange rekruttar. Dersom alt går som planlagt leiger me ein buss og dreg utover med bortimot 25 rekruttar komande laurdag, fortel Anstein Eidsvik