Hyllar ekteparet Kleppes dugnadsinnsats
Supportergeneral Tore Kleppe kler seg gjerne ut som ein teletubbie for å skapa stemning på Kuventræ, medan kona Anette er sjef i kiosken.
Minst fem dagar i veka jobbar Tore og Anette Kleppe dugnad på Kuventræ for Os Turn.
– Vi vart frivillige for å støtta opp om gutane våre då dei byrja å spela fotball. Sidan har vi blitt verande, fortel dei.
Artikkelen held fram under annonsen.
Mang ein fotballpode har gått med ryggen rak frå kamp på Kuventræ etter å ha blitt utropt av speaker Tore Kleppe til banens mest hardtarbeidande eller kampens beste keeper.
Og kor mange liter vaffelrøre Anette har steikt dei siste ti åra, anar ho ikkje.
– Difor startar vi kronerulling for å få ein heilfigur av Tore Kleppe i bronse på det nye idrettsanlegget, seier Stine Kobbeltvedt i Kvinneforeningen.
– Han kan stå i rundkøyringa, men kanskje har vi berre nok til å få støypt leggane i fyrste omgang, meiner Kleppe.
Kunstnar Arne Mæland er klar til å gå i gang, om Kvinneforeningen greier å samla inn kr. 300.000.
Kona Anette har gitt beskjed at ho ikkje ynskjer mannen avstøypt i teletubbie-kostyme.
– Puh, det sparer oss for 100.000 kroner, seier Kobbeltvedt letta.
anne-marie@osogfusa.no
