Fusa skule - ein god stad å vera

I det siste har ein kunna lesa i Os og Fusaposten ei framstilling av Fusa skule som vi ikkje kjenner oss igjen i, skriv FAU ved skulen.

LESARBREV: Som foreldre sender vi barna våre til Fusa skule i vissheit om at dei vert godt ivareteke både fagleg og psykososialt i gode omgjevnader.

Skulen på Fusa ber ikkje preg av at noko av bygningsmassen er gamal. Berre fasaden fortel at skulen er ein stolt bygning av eldre årgang.

Om lag halvparten av bygningen er nybygg. Skulen ellers er renovert med bl.a. nytt ventilasjonsanlegg og nye toalett. Skulen er også tilrettelagt for personar med fysiske funksjonshemmingar.

Fusa skule disponerer eit stort og oversiktleg uteområde med leikeapparat, kunstgrasbane, sandvolleyballbane og eit uteområde som er ypparleg til frileik. Ein dag i veka har heile skulen uteskule. Då vert tre flotte opparbeidde basar tekne i bruk. Desse er plasserte ved fjell, skog og sjø. I tillegg disponerer Fusa skule stor gymsal med god takhøgd.

Vi støttar FAU Strandvik i sin uttale om at samarbeid mellom skule og barnehage er viktig. At dette fungerer i praksis, tross avstand, er dagens fyrsteklasse i Strandvik eit godt døme på. Begge elevane gjekk i Trollskogen barnehage på Fusa.

Fusabygda er og blir eit naturleg knutepunkt. Fordelen med å plassera ein felles barneskule på Fusa er at dei aller fleste elevar har føresette som skal forbi Fusa til og frå jobb. Ein har såleis ein enkel praktisk moglegheit til å halda god kontakt med skulen. Det vil òg vera ei strategisk klok plassering når det gjeld levering og henting til SFO.

FAU på Fusa skule har ikkje søkt om privatskule. Dette er ikkje fordi me er likegyldige til skulen vår. Me har stor tru på den offentlege skulen, og ynskjer ikkje å senda barna våre i ei anna pedagogisk retning.

Me forstår at Strandvik ynskjer å behalda nærskulen sin, men om kommunestyret vedtek å leggja ned skulen i Strandvik skal de veta at born og foreldre er hjarteleg velkomne til eit godt samarbeid her på Fusa hausten 2016!

FAU Fusa skule