Ellevill Elvis-kveld

Wencke Marmoy har reist frå England til Røykenes for å gå i konfirmasjon. Lite visste ho om at kvelden skulle enda med eit kyss på kinnet frå sjølvaste kongen.

– Det var litt spesielt, seier ho og ler.

Marmoy har vore i konfirmasjon til nevøen sin tidlegare på dagen. Bror hennar bur rett over vatnet frå Er-An vegkro. No er det Elvis-show som står på programmet.

– Eg har vore Elvis-fan lenge. Familien min har alltid likt han, så eg har følgt med han heile tida, seier Marmoy før ho kastar seg ut på dansegolvet igjen.

2,10 på strømpelesten

I år er det 40 år sidan Elvis Presley døydde, men songane hans lever i beste velgåande. Det var laurdagens Elvis-show eit tydeleg bevis på.

– Det har vore ein fantastisk kveld. Det var fullt i teltet klokka 19. Vi måtte setja fram fleire stolar. No er det truleg mellom 250 og 300 personar her. I tillegg har vi open vegkro, så det er mykje folk, seier vertinne Linda Andersen.

Årsaka til festlegheitane var den høgtidelege avdukinga av restaurantens nye Elvis-figur. Andersen la sin elsk på den høgreiste karen for snart tretti år sidan, då ho jobba i ein bar i Puerto Rico på Gran Canaria. No er baren selt, og då krovertinna fekk snusen i at Elvis stod bortgøymt i ein garasje, tenkte ho: Skal han verkeleg stå der?

Å frakta han til Noreg viste seg å vera alt anna enn enkelt, men Andersen hadde bestemt seg, og då tek ho ikkje nei for eit nei. Den som til slutt kom Elvis til unnsetning var Norwegian-kaptein Per Storli og besetninga hans. Rockekongen måtte rett nok sagast i tre før han kunna stiga om bord på flyet.

– Eg stappa han inn i ein pitteliten leigebil – det var akkurat plass til å gira – og så køyrte eg til flyplassen, fortel Andersen.

Assisterte kongen

For å feira åtkomsten til Elvis, og venterommet der han skal stå og ta i mot gjestene, inviterte Andersen og co. til Elvis-show laurdag. På lista over dei som ønskte å hylla kongen var Jan’s rock’n’roll band, The Vossarebels, Twang Gang og Norges einaste fulltids Elvis-imitator, Kjell Elvis.

Merksemda sistnemnte tiltrekte seg var kanskje på nivå med rockekongen sjølv. I alle fall nesten. På Røykenes flokka folk seg rundt scena, dansa og sørgde for å foreviga augneblinken. På ”Love Me Tender” ljoma allsongen i teltet.

Blant dei ivrigaste tilhøyrarane langs benkeradene, var Sander Johansen (10). Han har spela bass i fire år, og vore Elvis-fan like lenge. På tre av låtane spelte han i lag med Kjell Elvis på scena.

– Eg ringte Kjell Elvis og spurte. Dei har spela i lag to gongar tidlegare også, på Danskebåten, fortel mamma Elisabeth Johansen.

Sander var, naturleg nok, ikkje den einaste med stor interesse for Elvis i salen. Michael ”Micen” Seilen er Elvis-imitator sjølv. Han har reist frå Bjorøy på Sotra i bubil for å få med seg showet.

– Eg kan alle songane og har spesiallaga kostymer. Eg har til og med planar om å skaffa meg ein tatovering, fortel han.

– Lærte du nokre nye triks i kveld?

– Nei, eg kan alle frå før, seier han og gliser.

– Frykteleg glad i Elvis

For vertinna har det gått i eitt. Andersen synest det er kjekt å sjå at det ikkje berre er ho som er Elvis-fan på sin hals. Men om Elvis-showet vert ein årleg tradisjon, torer ho ikkje svara på enno.

– Det er mykje logistikk med fire band på scena, og musikarar som skal hentast og bringast i Cadillacar. Det har vore ei lang veke. Vona er at eg skal få sova litt på måndad, seier ho og smiler.

– Men det har vore ein fantastisk kveld. Showet er det mest vellukka vi har hatt på lenge, legg Andersen til.