Vedgår at hurtigtestane kan gje falsk tryggleik. Hadde helst sett fleire påbod
— Ja, det kan vera eit problem om ein testar seg for tidleg. Karantene er heilt klart tryggare, seier Jonas Nordvik Dale.
Den siste tida har fleire skular i kommunen hatt smitteutbrot blant elevane. Likevel er det ikkje noko som tilseier at ein vil byrja å senda folk i karantene igjen. I alle høve ikkje på denne sida av jul.
— Det blir offentleggjering av nye tiltak i kveld, men eg trur ikkje det omfattar karantene på elevar. Slik eg forstår det, er regjeringa veldig opptekne av å halda skulane i gang fram til jul, seier Jonas Nordvik Dale.
Artikkelen held fram under annonsen.
Den assisterande kommuneoverlegen meiner ein burde kome med strengare tiltak.
— Generelt meiner eg det er for mykje tilråding og for lite påbod. Eg trur det er vanskelegare for folk å forholda seg til tilråding, og eg trur at påod vil gje oss sterkare smittevern, seier han.
Falsk tryggleik
Bjørnafjorden kommune har vore i fleire møte med Stasforvalteren den siste tida. Her har dei spelt inn at karantenetid for elevar som har vore tett inn på andre elevar som har fått korona, burde gjeninnførast.
— Slik eg forstår det, vert det ikkje innført karantenetid. Om då kommunen her lokalt kunne innført dette, er eg usikker på. Men det hadde i alle høve vore bra for smittevernet, seier han.
— Forklar?
—Slik det er no, skal elevar som går i klasse med dei som er blitt smitta, testa seg sjølv ved neste skuledag. Den testen kan gje ein falsk tryggleik. Inkubasjonstida er frå 3 til 5 dagar. Då kan ein få ein negativ prøve, sjølv om ein alt er smitta, forklarar Dale, og held fram:
— Difor har me her i kommunen sagt at ein også må testa seg ein gong til i løpet av eit par dagar, for å vera sikker på at den negative testen vitterleg var negativ, seier han.
— Då kan fleire ha hatt korona og smitta mange medan dei trudde dei var negativ?
Artikkelen held fram under annonsen.
— Ja, nettopp, og dette er jo grunnen til at me er mange som meiner at når smitten i landet er som han er, vil karantene vera det einaste rette for verkeleg å få avgrensa smitten, slår Dale fast.
