Valprat i høgda

Denne vekas lunsjprat om val tok me med arbeidarar på OBOS sine nybygg i Solstrandvegen.

Sist veke prata me med ambulanse-arbeidarar. Denne veka fekk me innpass hos tre røyrleggjarar frå Skåtun Rørleggarforretning i Fusa. Sigbjørn Sjursen, Stein Ove Samnøy og Nils Ove Sundvor har jobba på bygget i fleire veker. Fredag tok dei lunsjen i det som skal bli ei av dei beste utsiktsleiligheitene i blokk C.

1. Pratar de om lokalpolitikk i lunsjen?

- Tja, me pratar i alle høve om skulestruktur-saka i Fusa, seier Stein Ove.

- Og me er nok samde om at me må prøva å behalda dei skulane me har, seier Sigbjørn.

- Dersom me skal ha tilflytting, må me jo ha nok skular, legg Nils Ove til.

2. Kva saknar de fokus på i årets valkamp?

- Eigentleg ikkje så mykje. Me er mest glad for at det vert fokusert på skulepolitikken, svarer dei tre.

3. Bør kommunen dykkar ta imot fleire flyktningar?

- Ja. Me har plass til det, og bør stilla opp som andre byar og bygder i Noreg, seier Sigbjørn.

- Alle bør bidra, seier Nils.

4. Er det sakar som dykkar yrkesgruppe er ekstra opptekne av no?

- Me følgjer jo med på nedgangstidene i oljebransjen. Førebels har det ikkje fått så mykje å seia for vår del, men andre rørleggjarar, som til dømes dei som jobbar i offshore-bransjen, kan jo fort bli berørte, seier Sigbjørn.

- Aukande arbeidsledigheit er jo generelt skummelt og kan gje store ringverknader i samfunnet, seier Nils Ove.

5. Har de bestemt dykk for kva de skal stemma?

- Nei, svarer Sigbjørn kontant.

- Me har jo ikkje så mange val dersom me vil stemma på nokon som vil ivareta den skulestrukturen me har, seier Nils Ove.

- Eg vil også behalda skulestrukturen i Fusa, men eg har ikkje heilt bestemt meg, seier Nils Ove.

6. Er de nøgde med dei som styrer i heimkommunen dykkar no?

- Både ja og nei...det var jo dette med skulane då, humrar lunsjtrioen i toppetasjen i blokk C.