Uavgjort med ti mann på banen
Trass ei utvising i første omgang, klarte Os å halda Staal Jørpeleand på armlengdes avstand. Kampen på Kuventræ i ettermiddag enda 2-2.
Os tok leiinga i kampen etter nesten 20 minutt. Endre Brenne sette inn den første fulltreffaren etter ein retur på eit skot frå Knut Spangelo Haga.
- Første omgang var relativ bra, seier kaptein Torkel Hjertnes, som vart kåra til dagens osing på Kuventræ i ettermiddag.
Artikkelen held fram under annonsen.
Gjestene utlikna kort tid etter 1-0-skåringa til Brenne. Deretter fekk Marius Mikkelsen sitt andre gule kort, og vart sendt av banen.
- Det var litt strengt. I alle fall det første gule, meiner Hjertnes.
Trass éin mann mindre, klarte Stian Lunde å setja ballen i mål for heimelaget. Os gjekk dermed til pause med 2-1-leiing.
Utlikna i slutttminutta
Andre omgang bar preg av at osingane var i mindretal.
- Vi skapar ikkje så mykje. Vi vert liggjande å forsvara oss heile tida, oppsummerer Hjertnes.
Kapteinen synest likevel at lagkameratane gjer ein kjempeinnsats.
- Vi vinn mange duellar, og legg bak oss mange kilometer på banen, seier han.
Då er det ekstra kjedeleg at gjestene klarar å utlikna tre minutt før slutt.
Artikkelen held fram under annonsen.
- Det var fortjent. Det viktigaste er at vi tek poeng, men det er sjølvsagt kjedeleg når vi er så nære ved å vinna.
Neste kamp er i Haugesund 5. oktober. Då møter Os ein av dei tøffaste motstandarane på tabellen.
- Det er sannsynlegvis Haugesund 2 som kjem til å rykka opp, men vi skal gjera vårt beste for at dei ikkje gjer det, seier Hjertnes.
