Trur på fire nye år

Sjølv ordførar Terje Søviknes måtte fram med legitimasjonen då han røysta på Lysekloster skule i føremiddag.

- Eg har sove godt i natt, men eg er veldig spent på korleis det går med oss i dag, seier ein dresskledd Terje Søviknes etter å ha gjort si borgarplikt.

På dei minutta han brukte inne i stemmebåsen, rakk han nok både å kummulera seg sjølv og føra opp ein og annan slengar frå eit anna parti,

- Jobben din har stått på val fire gonger før. Er du nervøs for å verta arbeidsledig før kvelden er omme?

- Nei, det er eg ikkje. Skulle eg mista jobben, så vil det no alltids ordna seg. Men eg har svært lyst til å levera på vegner av Framstegspartiet. Det er no ein gong slik at Os har vorte eit symbol for resten av landet, seier han.

Kjeft frå Siv?

- Får du kjeft av Siv Jensen om det går dårleg?

- Nei, det gjer eg ikkje. Ho sende meg seinast ein sms i går og ynskte lykke til, smiler han.

Søviknes vedgår at det har vore ein krevjande valkamp for partiet på landsplan.

- Eg vil ikkje seia at det har gått dårleg, men vi har heller ikkje gjort nokon god valkamp, seier han.

- Bergens Tidendes meiningsmåling torsdag viste at opposisjonen nærmar seg?

- Meiningsmålinga har berre motivert oss til å stå på endå meir og mobilisera fram mot valdagen. Eg trur dette skal gå bra for oss. Opposisjonen sprikar i såpass mange retningar at eg tvilar på dei representerer noko reelt alternativ.

- Det einaste dei eigentleg er samde om, er å få vekk Frp og underteikna, smiler han.

Klar til forhandling

Etter mange veker med Fjordland-middagar og frosen-pizza har Søviknes i dag tenkt å unna seg ein betre middag ute, før Frps valvake startar på Solsiden utpå kvelden.

- Valet er snart over, men dagane framover blir ekstremt viktige. Spesielt på fylkesplan der konstellasjonane ser ut til å skifta. Då gjeld det å vera klar til forhandlingar alt i løpet av natta, seier han.