Totalt tre nye smittetilfelle påvist torsdag

Tre personar fekk påvist covid-19 i Bjørnafjorden torsdag. Éin av dei er eleven på Nore Neset ungdomsskule.

Det opplyser kommunen.

Det eine tilfellet er eleven på 9. trinn ved Nore Neset ungdomsskule, som me skreiv om i går. Her er smittevegen ukjend. Elevar og lærarar som er nærkontaktar er sett i karantene.

Det andre tilfellet er ei kvinne i 40-åra. Ho er i same husstand som eleven ved Nore Neset ungdomsskule. Også her er smittevegen ukjend. Nærkontaktar av vedkomande er sett i karantene.

Det tredje tilfellet er ein ungdom i slutten av tenåra. Vedkomande er elev ved vidaregåande skule i Bergen. Smittevegen er kjend og nærkontaktar i karantene, ifølgje kommunen.

– Vi har i tillegg fått stadfesta at éin av dei to positive prøvane frå 23. februar er av den engelske koronavarianten. Dette dreier seg om ein person som kom frå utlandet, og blei testa ved ankomst på Flesland. Han har ein nærkontakt i same husstand, opplyser kommuneoverlege Klaus Melf til kommunen sine heimesider.