To nye smittetilfelle ved Lurane: - Vi kjem til å testa hyppig
Éin tilsett og ein bebuar ved Luranetunet bu- og behandlingssenter har fått påvist covid-19.
Begge blei testa som nærkontaktar etter at ein tilsett ved same avdeling fekk påvist smitte torsdag. Det opplyser kommunen.
Bebuarar og tilsette ved den aktuelle avdelinga blei rutinemessig testa som nærkontaktar. Så langt i dag har altså to nærkontaktar testa positivt: éin bebuar og éin tilsett.
Artikkelen held fram under annonsen.
– Den smitta tilsette er ikkje vaksinert. Den smitta bebuaren er fullvaksinert. Ho har ingen symptom og er i god form, uttaler assisterande kommuneoverlege, Jonas Nordvik Dale, til kommunen sine nettsider.
Nordvik Dale seier at det er svært liten risiko for at ein fullvaksinert person utviklar alvorleg sjukdom.
– Dei smitta er isolerte. Vi kjem til å testa hyppig, men sjukeheimen og avdelinga kan driva som vanleg. Vi har diskutert dette med Folkehelseinstituttet, som er einige i vår avgjerd, legg han til.
Han konstaterer at «det kan verka overraskande at fullvaksinerte blir smitta».
– Vaksinen gir 95 prosent beskyttelse, men det er altså likevel fem prosents sjanse for at ein kan bli smitta - og smitta vidare. Heldigvis beskyttar vaksinen òg godt mot utvikling av alvorleg covid-sjukdom, seier Nordvik Dale.
