Kontroll-leiar i Statens vegvesen Lars Harald Drange synest det var i overkant mange som køyrde utan bilbelte i Os torsdag. - Mange har den uvanen at dei tek på seg belte etter at dei har byrja å køyra. Det er ein uheldig uvane som kan få fatale følgjer, seier Drange.

Svært mange utan bilbelte

Torsdag hadde Statens vegvesen bilbeltekontroll fleire plassar i Os. Resultatet var nedslåande.

Kenneth Svenningsen kenneth.svenningsen@osogfusa.no

Publisert: 12.01.2017 15:38 Sist oppdatert: 15.03.2017 21:58

- Rett nok via me heile dagen i Os og stansa mange køyrety, men resultatet var ikkje bra. Alt for mange sat i bil, buss eller lastebil utan å bruka bilbelte, seier kontroll-leiar Lars Harald Drange.

Fekk åtvaring

Vegvesenet starta kontrollen sin ved Vognhallen i Os sentrum. Her stansa dei totalt ti bussar.

- Jamt over kan me seia at om lag halvparten av alle passasjerane sat utan bilbelte. Denne gongen sleppte dei unna med ei åtvåring. Neste gong vert det 1.500 kroner i bot, seier Drange.

Etter lunsj forflytta han og kollegaane seg til Industrivegen. Her var dei ettermiddagen ut.

- Samla delte me ut 11 forenkla førelegg for manglande bruk av bilbelte. I tillegg fekk 13 bilistar skriftleg mangellapp. Ein sjåfør er også meldt for å ha køyrd med uregistrert hengjar, fortel Drange.