Stornissen vaker over Vågshaugen

Marius ville ha den største nissen i Os. Mamma Hege fekk sjokk då ho såg den fem meter høge raude kolossen.

Marius Bergesen er ein type som tenkjer: Skal det vera, så skal det vera. Denne jula viser han det til fulle med sin gigantiske julenisse som no står og vaker over Vågshaugen.

– Er det slik at storleiken tel, Marius?

– Ja, det er klart. Eg skulle ha den største julenissen her i Vågshaugen. Med denne kameraten her, har eg sikkert den største i Os også, ler 22-åringen.

I lag med kjærasten Andrine Døsen heiv han opp julenissen for ei veke sidan. Etter det har nissefar fått mange vink og helsingar frå folk som har gått forbi nede i gata.

Måtte saga tujaen

Den oppblåsbare gigantnissen er fem meter høg og 2,5 m brei. For å halda han oppe, og «i live» må han forast med frisk oksygen frå ei 230 volts luftpumpe som pumpar kontinuerleg.

– Han er eigentleg ganske smart heile løysinga. Nissen held seg oppblåst og fin heile tida, fortel nissefars skapar.

– Er alle like begeistra?

– Ja, eller mamma vart litt sur då ho såg at eg hadde saga ned ein tujabusk for å få plass til han, men ho fekk seg også ein god latter, og likte han godt etter å ha vant seg til det.

Konkurransen er i gang

Den gedigne nissen kosta han nokre store lappar, men Marius føler det var verd det.

– Eg har fått mange kommentarar. Enkelte har også prata om å få seg ein lik.

– Kva gjer du då?

– Då må eg jo berre kjøpa ein endå større. Eg har sett dei har opp til ti meter høge på nettet, men det må bli til neste jul.

– Då spørst det vel om han ikkje fyk av garde i vinden?

– Tja, det kan du seia. Denne står i alle høve godt. Eg har stroppa han fast i terrassen bak, så her skal nissefar få stå til godt over nyttår, avsluttar Marius.

kenneth.svenningsen@osogfusa.no