Skiltet har skapt undring: — Har det nådd dykk òg no?

Lillian Hovden Bugge smiler godt når Os & Fusaposten ringjer og spør om skiltet.

Det er mange som har undra seg over skiltet ein møter ved Heio gard i Sævareid. Teksten er ikkje av den vanlege «Køyr forsiktig»-sorten.

«Åtvaring!!! Lause dyr, barna leker. Gubben er forvirret og kjerringa er ikkje go' ho heller. Køyr sakte, så får du med deg heile sirkuset», er meldinga på det svært gule skiltet.

— Det er litt av ein tekst. Kva er det som ligg bak?

— Det er for å gjera folk merksame på at det er litt leik og leven i området. Samstundes er det gjort med litt humor i staden for på «kjefte-vis», fortel Lillian.

— Men at kjerringa ikkje er god ho heller?

— Ja, den får eg tola. Me må jo ha litt sjølvironi og humor i kvardagen, ler Lillian.

Ho fekk skiltet i julegåve av ektemannen Sten Bugge for eit par år sidan. Sist veke var det ein forbipasserande som tok bilete av det og la det ut på Facebook.

— Eg har fått nokre kommentarar. Ja, det er humor og ja, det er sjølvironi, men det ligg også litt alvor i det, vedgår Lillian.

Høg fart i området

På Heio gard der Lillian og ektemann Sten bur er det nok av levande vesen i området. Der ligg også alvoret i skiltet.

— Me har fire born som bur her, og dessutan mange dyr deriblant, hest, sauer, lamaer, høns og hund. Det er med andre stadig ein fare for at det kjem noko eller nokon ut i vegbanen, og det kan sjølvsagt bli farleg både for trafikantane og for dei som kjem ut herifrå, seier Lillian.

— Er det mykje farleg køyring i området?

— Det er 60 km-sone på vegen forbi her, men dei fleste held kring 80 km/t. Det er sjølvsagt ikkje så kjekt for oss som bur her. Med skiltet ønskjer me berre at folk skal tenkja seg litt om å ta omsyn, vera budde på at det kan koma dyr eller folk ut frå garden og at ein då tilpassar farten til fartsgrensa, seier Lillian.

— Men skiltet åtvarar også om litt rare folk, ein forvirra mann og ei kjerring som ikkje er så god. Ligg det noko her om at folk også bør halda seg unna?

— Nei, på ingen måte. Her er folk meir enn velkomne inn. Det står jo nedst på skiltet «Køyr sakte så får du med deg heile sirkuset», så me er ikkje sky. På ingen måte, ler Lillian.

— De fekk i alle høve lokalavisa på kroken og fleire kommenterer skiltet på Facebook. Kanskje er de i ferd med å lukkast med stuntet?

— Ja, når meininga var å gjera folk merksame på kvifor det er lurt å dempa farten, var dette skiltet kanskje det som skulle til. Ein kjem gjerne lengre med humor enn med peikefingeren, konstaterer Lillian.