No er det priskrig på iskrem i Os

– Frysedisken blei tømt veldig fort, seier butikksjef på Kiwi, Linn Frøkedal Røen.

Det var Coop som starta is-krigen tysdag ved å setja prisen på ein sekspakke krone-is til 20 kroner. Dermed kostar ein krone-is 3,33 kroner. I løpet av få timar følgde Rema 1000 opp med eit tilsvarande tilbod, og det same gjorde kjeden med mottoet «Vi gir oss aldri på pris» - Kiwi.

Måtte få ny ladning

Butikksjef ved Kiwi Haugsneset, Linn Frøkedal Røen, merkte godt priskrigen tysdag ettermiddag.

– Så snart det gjekk opp for kundane våre kva prisen låg på, tok det skikkeleg av, seier Røen.

Frysedisken var omtrent skrapa då Os og Fusaposten var innom.

I tillegg til krone-is-tilbodet har kjeda også skrudd ned prisen på andre pakkar.

- Eg fylte frysedisken opp med is på søndag, og no er det tomt. Heldigvis kom det akkurat ein ny ladning, seier Frøkedal.

- Tener de noko pengar på slikt, då?

- Nei, men me tener fornøgde kundar. Det er det viktigaste, seier ho.