Naudropet frå nærbutikkar: Førebels ingen ekstramidlar frå regjeringa
Frp fryktar butikkdød i distriktsnoreg etter at over 80 nærbutikkar har sendt ut naudrop. Førebels kjem det ikkje ekstra midlar frå regjeringa.
– No må det skje noko raskt, seier Frps Helge André Njåstad.
I spørjetimen på Stortinget onsdag, kritiserte han kommunal- og distriktsminister Sigbjørn Gjelsvik (Sp) for ikkje gjera meir for nærbutikkane, som slit med høge straumrekningar.
Artikkelen held fram under annonsen.
– Berre i heimkommunen min Austevoll er det éin butikk som har lagt ned på grunn av straumprisane, og det er fleire andre som slit. Den butikken som tok først kontakt med meg, i Bakkasund, fortel at dei hadde straumrekningar på 12.000 kroner før. No er det 60.000 kroner, seier Njåstad.
Naudrop frå nærbutikkar
Sist veke sende over 80 nærbutikkar ut eit kraftig naudrop. Mange av dei hevdar å nærme seg randa av konkurs. Det er snakk om butikkar frå kjedene Nærbutikken, Matkroken, Snarkjøp, Joker og Coop Marked i heile Sør-Noreg. Butikkane viser til at dei vart definerte som samfunnskritiske under pandemien.
– Utan daglegvarebutikken stoppar bygdenoreg, skriv dei i naudropet.
Distriktsministeren svarer at regjeringa allereie har lansert ei nasjonal støtteordning for næringslivet for å hjelpe bedrifter som slit med høge straumutgifter.
– Samtidig følgjer vi situasjonen tett og vurderer løpande behovet for nye tiltak, seier Gjelsvik.
Frp etterlyser handling
Njåstad er forundra over at partiet til distrikta, Senterpartiet, ikkje gjer meir for nærbutikkane.
– Det er litt rart. Går vi eitt år tilbake, så var Senterpartiet veldig opptekne av distriktsnoreg. Dei var bekymra for alt. Og no står vi her etter at Sp kom i regjering, og det er Framstegspartiet som er opptekne av butikkdød i distrikta. Det er vi som åtvarar om dette, seier Njåstad.
Han meiner regjeringa bør løyva meir pengar til Merkur-programmet, som allereie deler ut støtte til nærbutikkane.
Artikkelen held fram under annonsen.
– Straumstøtteordninga var for dårleg, men Merkur-ordninga er eit verktøy ein kan bruka, seier han.
Sjølv om kommunal- og distriktsministeren ikkje har pengar å løyva no, ser han ikkje bort frå at det kan koma noko i framtida.
– Det godt vera at det er behov for både forsterka og nye tiltak, utover det vi så langt har lansert. Det vil vi i så fall komme tilbake til, seier Gjelsvik.
