Mistenkjer ikkje noko kriminelt: — Me gjer ulike undersøkingar

Politiet i Bjørnafjorden stadfestar torsdag ettermiddag at ein ukrainsk mann på 27 år har vore sakna sidan tysdag.

Politiet var tidlegare torsdag i møte med mannens familie og vart oppdatert på opplysningar om når han vart sist sett og korleis han gjekk kledd.

— Me kan stadfesta at ein ukrainsk mann i slutten av 20-åra er sakna frå heimen sin i Bjørnafjorden, og me er no i ein fase der me gjer ein del undersøkingar for å prøva å finna ut kvar han har teke vegen, seier politioverbetjent Christine Grindstein.

— Har de kalla inn leitemannskap?

— Nei, me har ikkje sett i gang leiteaksjon. Dette er rett og slett fordi me ikkje har noko konkret område å leita i.

— Kan de seia noko om kva hypotesar de no jobbar utifrå?

— Eg kan seia at me ikkje mistenkjer at det har skjedd noko kriminelt, elles held me fleire moglegheiter opne. Me vil koma tilbake med nye opplysningar så snart me veit meir.

— Har de sjekka alle reiseruter frå Os og Bergen, eventuelt også tog og fly?

— Eg vil ikkje gå konkret inn på kva ulike undersøkingar me gjer no, men me jobbar med saka, slår Grindstein fast.

Ho legg til at om folk har tips i saka, kan dei ta kontakt med politiet på telefon: 476 96 060