Landa på tre utgreiingsalternativ
Med éin representant i manko, og ordførar Marit Aksnes Aase (KrF) si dobbeltrøyst, gjekk kommunestyret i Samnanger inn for å skrota vidare utgreiing av Bjørnefjord-alternativet. Fusa held på tre alternativ.
Camilla Kvamme
Artikkelen held fram under annonsen.
camilla.kvamme@osogfusa.no
Spørsmålet i kommunestyret i Fusa i førre veke, var om avgjerda skulle ha noko å seia for fusinganes framferd i utgreiingsfasen av kommunereforma.
I utgangspunktet låg tre alternativ på bordet. 1. Fusa åleine, 2. Fusa som del av ein ny Bjørnefjord-kommune og 3. Fusa i lag med Samnanger og Kvam.
- Eg meiner at mykje har endra seg sidan styringsgruppa sitt møte 11. juni, sa Gunnar Hansen (Frp).
Representanten frå Framstegspartiet lurte på om det var mogleg å føya til eitt alternativ der Fusa, i lag med Samnanger, vende seg mot kommunane som grensar mot Bergen.
Ordførar Hans S. Vindenes (Sp) peika på at vedtaket som vart gjort i kommunestyret i Samnanger 16. juni, var eit skjørt vedtak.
- Det er ingenting i vegen for at Samnanger kan kobla seg på Bjørnefjord-alternativet på eit seinare tidspunkt, dersom kommunen ønskjer det, sa ordføraren.
Artikkelen held fram under annonsen.
Skeptiske til alternativ 2 og 3
Mikal Leigland (Sp) meinte at dersom fusingane fekk hovudsetet sitt i Norheimsund, så ville det få negative konsekvensar for sysselsetjinga i kommunen.
- Eg kunne godt ha klart meg utan alternativ tre. Fusa må ha som mål å ivareta flest mogleg av tenestene sine i eigen kommune, sa Leigland.
- Eg er slett ikkje samd med Leigland. For oss som bur i Nore Fusa kunne like så godt alternativ to ha vore stroke, understreka Margunn Y. Samnøy, også ho frå Senterpartiet.
Mange var opptekne av grensejusteringar, og at det vil vera naturleg å ta med seg deler av Kvinnherad, og kanskje også Kvam, inn i ein ny kommune. Eventuelle justeringar vert del av alle dei tre utgreiingsalternativa.
Aud-May Boge (H) meinte det var viktig å ikkje lukka nokon dører alt no, men at ein arbeidde vidare med dei tre alternativa, samt at ein hadde bergensalternativet i "kulissane".
Kommunestyret gjekk samrøystes inn for at ordføraren og styringsgruppa, parallelt med dei tre utgreiingane, skal følgja opp med drøftingar med andre potensielle kommunar.
