Land i sikte

Sigfred Rosvold meiner hyttetomtene han eig på Haganeset i Fusa er så godt som verdlause utan naust. I forslaget til ny arealplan får han gehør for synspunktet sitt.

Av oppstartssøknaden til Rosvold går det fram at tiltakshavar ønskjer å regulera inn eit naustområde med kaianlegg i tilknyting til hyttefeltet. Men av di planane ikkje samsvarte med gjeldande arealplan, vart ønsket i utgangspunktet ikkje imøtekome.

No er framlegget til ny arealplan for Fusa kommue for 2015-2027 klart. I den nye planen er arealet mellom hyttefeltet og sjøen sett av til område for båthamn.

- Planlagde hytteområde i nærleiken av sjø bør ha tilgang til sjø, heiter det i vurderinga frå kommunen.

- For lang tid

Reguleringsplanen for hyttefeltet på Haganeset vart, til liks med revidert arealplan, handsama av utval for plan og miljø i ettermiddag. Planen, som vart lagt ut til offentleg ettersyn for meir enn eitt år sidan, skulle eigentleg ha vore handsama i haust.

- Det har teke altfor lang tid, vedgår rådmannen i framlegget sitt til vedtak.

- For eitt år sidan låg planen på is i om lag tre kvart år fordi det var personellmangel i kommunen. No får eg beskjed om at planen ikkje kan handsamast fordi alle ressursar går med til å arbeida med arealplanen, sa Rosvold til «Os og Fusaposten» i vinter.

Tiltakshavar var redd for at dersom planen ikkje vart godkjent før sommaren, så ville det gå endå eitt år før det skjedde noko.

Trekte motsegn

I april 2014 fremja Norges vassdrags- og energidirektorat (NVE) motsegn mot reguleringsplanen. Årsaka var at kartlagde fareområde ikkje var innarbeidde i plankartet som ei omsynssone.

- Planområdet ligg innanfor aktsemdområde for steinsprang og snøskred. Det er naudsynt med sikringstiltak på nokon av tomtene før utbygging, skreiv Fylkesmannen i Hordaland til Fusa kommune.

I samråd med kommunegeolog vart to av tomtene reduserte. Dette for å gå klar omsynssona, slik NVE kravde. Dermed fall grunnlaget for motsegna bort, og for få veker sidan vart motsegna trekt.

Betre sikt

Statens vegvesen har bede planleggjar om å sikra at tilkomsten til hyttefeltet er godt nok utforma. Vegvesenet har i tillegg merknader til planframlegget når det gjeld sikta i krysset mot tidlegare fylkesveg 48.

- På grunn av fjellnakken i svingen på oppsida av vegen, er sikta mot Eikelandsosen ikkje optimal. Ved å sprengja bort denne vil ein få betre sikt og meir fyllmasse til fyllinga som er planlagd i tilknyting til avkøyrsla. Dette må vurderast under utbygginga, sjølvsagt i dialog med vegstyresmaktene, heiter det i sakspapira til planutvalet.

Trass mykje arbeid og mykje venting, ser det ut til å gå rett veg for tiltakshavar Rosvold.Rådmannen rår planutvalet til å godkjenna reguleringsplanen.