Inspirasjon er henta frå ein annan butikk, men dei hevdar at denne bollen er unik

“Nore Neset-bollen” såg dagens lys i 2021, og er framleis ettertrakta.

— Er dette ein lokal bolle?

— Ja, seier Hilde Fedje (49).

Ho er sjef i brød- og bolleavdelinga på SPAR Nore Neset i Ådnadalen.

Vidare fortel ho at sjølve bollen kjem fryst. Det er altså alt som skjer etter at bollane blir henta opp frå frysen, til dei hamnar i hendene og sidan i munnen på kundane, som gjer bollen lokal.

— Kva er “Nore Neset-bollen”?

— Det er ein skillingsbolle med ekstra sukker og god vaniljekrem, fortel Fedje.

Henta inspirasjon frå annan butikk

Det er heller ikkje ein singel bolle, men til liks med Strandvikbollo, er det to bollar sett saman til éin.

Det var i samband med testing av nemnde Strandvikbollo opp mot Søftelandsbollen, at underteikna blei kjend med at også Nore Neset hadde ein lokal variant — ein bolle med stadnamnet til utsalsstaden.

Fedje fortel at dei har henta inspirasjon frå ein lokal butikk, men at ho ikkje hugsar heilt kva butikk det er snakk om.

— Litt dumt om eg seier feil også, seier ho og smiler.

Selde nesten 10.000 eksemplar

Dette er absolutt ikkje eit ferskt produkt i butikken. Mariann Brandseth, som er “potet” i butikken, fortel at det gjekk unna då bollane blei del av sortimentet tilbake i 2021.

— Det var det beste salsåret. Då gjekk dei unna. Det blei selt 9.836 bollar. Så langt i år har vi seld 5.727, fortel ho.

Dei to legg til at det — ikkje overraskande — går ekstra mange bollar på godvêrsdagar.

Nore Neset-bagettar

Dette er ikkje det einaste produktet stempla med “Nore Neset”. Dei sel også “Nore Neset kjøttbollesub” og “Nore Neset kyllingbaguett”.

— Kva er det som er greia?

— Det er jo ein gimmick. Den med kjøtbollar har vi berre hatt eitt år. Begge variantane sel godt. Vi er meir “grab and go” her med tanke på varmmat. Vi er gode på lunsjprodukt, men ikkje store på middag, seier Brandseth og smiler.