Høg fart og manglande bilbelte: Politiet har hatt laserkontroll på Halhjemsvegen

Nok ein trafikkontroll gjennomført langs Halhjemsvegen.

Politiet gjennomførte måndag laserkontroll i 70-sona på Halhjemsvegen.

Det er opplyst at dei stilte seg opp rett før klokka 12.

— Det blei skriven ti forenkla førelegg. Høgaste fart var 88 km/t. Det blei også gitt eit gebyr for manglande bilbelte, skriv politioverbetjent Anne Lyssand ved Bjørnafjorden politistasjon.

Stor stein viste seg å vera søppelsekk

Kort tid etter at laserkontrollen starta, blei det meld om at det låg ein stor stein i venstre felt i Lyshorntunnelen i retning Bergen.

— Vegtrafikksentralen blei varsla og skulle stengja tunnelen og få fjerna steinen, skriv Lyssand.

Det viste seg å ikkje vera ein stein, men ein søppelsekk som låg i vegbanen.

I 13-tida opplyste Vegtrafikksentralen at søppelsekken var fjerna og tunnelen var opna for trafikk att.