Har utvida farevarselet: Hit, men ikkje lenger.

Bjørnafjorden ligg i «stormens auge».

Det gule farevarselet for regn i Rogaland og sørlege deler av Hordaland, vart i ettermiddag utvida til å gjelda så langt nord som til Bjørnafjorden.

I Rogaland og Hordaland sør for Os er det venta mellom 60 og 100 mm nedbør fram til onsdag morgon.

Også i Sogn og Fjordane og kyststrok nord i Hordaland vil det regna kraftig.

Vesle Bjørnafjorden derimot, ser ut til å sleppa.

— Kva er det som gjer at akkurat vi slepp unna denne gongen?

— Nedbøren kjem av eit lågtrykk aust for oss, men «ein slags snurr» på lågtrykket gjer at Bjørnafjorden går klar.

Det seier vakthavande meteorolog Dina Stabell. Ho synest «stormens auge» er ei grei forklaring på situasjonen for vår kommune.

— Noko farevarsel får de ikkje, men det kjem nok til å regna ein del i Bjørnafjorden også.

— Farevarselet gjeld til Bjørnafjorden. Betyr det at det vil hølja ned midtfjords på ferja til Sandvikvåg?

— Ja, det vil du kunna risikera.

Rådet frå meteorologane er uansett å skalka lukene, og følgja med på vêrradaren.

Sol i vente?

Det har vore nokre tunge, våte veker for solhungrige nordmenn. Finst det noko betring i sikte?

— Ja, morgondagen ser ut til å bli veldig fin, eigentleg. Det blir sol, opphald og rundt 20 grader.

Også dei komande dagane vert temperaturen høgare enn han har vore i det siste.

— Det vil framleis vera skiftande vêr, og det kan koma byger dei komande dagane. Men det blir i alle fall betre enn i det siste, lovar Stabell.

— Og om du ser litt lenger fram, kjem sommaren tilbake?

— Njei, eg ser dessverre ikkje noko stabilt høgtrykk nokon stad. Det vi må ha for å kunna varsla stabilt finvêr.