Hamnesjefen på vakt igjen

Svanefar måtte gjennom både narkose og endoskopi – men no sym han atter i det fri.

Tysdag vart den lokale kjendissvana Hamnesjefenfunnen med gøtt rundt halsen og i nebbet av nokre tredjeklassingar i Mobergsvika. Veterinær Eva-Kristin Lunde rykte ut på fritida og fekk frakta svana til dyreklinikken. Frykta var at svana hadde fått ein fiskesluk i svelget.

I narkose

Onsdag blei svana grundig undersøkt.

– Røntgenbiletet viste heldigvis at det ikkje var nokon kron i fuglen. Deretter gav me han gassnarkose for å undersøkja matrøyr og mage med endoskop. Me kunne konstatera at det ikkje var skadar nedover i det lange matrøyret, og me gjorde heller ingen funn av snøret, seier Eva-Kristin Lunde.

Ho takkar også 3.-klassingane som reagerte så raskt.

I det fri att

Sølvi Bugge og andre frivillige i Svanehjelpen i Os var onsdag kveld med på å setja Hamnesjefen fri att.

– Etter å ha køyrt rundt halve Os for å finna svanemor og ungane, utan hell, sette med Hamnesjefen fri ved Oselvarnaustet. Og der dukka frua og dei tre små fram rundt neset, skriv Sølvi Bugge i ei facebookoppdatering.

Torsdag morgon vart Hamnesjefen observert i full vigør ved Os marina der han irettesette nokre arbeidarar om bord i ein båt før han la kursen vidare mot Mobergsvika att.

ol@osogfusa.no