Gult nivå på vidaregåande: To ungdomsfestar har ført til 16 smittetilfelle

Smitteutbrot blant ungdom gir gult nivå på vidaregåande skular i Bjørnafjorden kommune.

To ungdomsfestar i Bjørnafjorden kommune sist fredag har så langt ført til 16 smittetilfelle. Eit høgt og uklart tal på nærkontaktar til dei smitta, gjer smittesporingsarbeidet utfordrande, skriv Bjørnafjorden kommune på heimesida si.

— Kommunal kriseleiing har vore samla fredag kveld for å diskutera og setja i verk tiltak. Vi har òg hatt møte med Statsforvaltaren og representant for fylkeskommunen. For å få ro og oversikt over situasjonen, har Bjørnafjorden kommune, i samråd med skuleeigar Vestland fylkeskommune, vedtatt å innføre gult smittevernnivå på tre vidaregåande skular i kommunen vår: Os gymnas, Os vidaregåande skule og Fusa vidaregåande skule, frå måndag 16. august, seier ordførar i Bjørnafjorden kommune, Trine Lindborg i saka.

Ordføraren legg til at ein har auka smittesporingskapasiteten.

— Slik kan vi raskare nå ut til nærkontaktar. Teststasjonen på Os-sida vil vera open søndag 15. august, slik at endå fleire kan teste seg før skulestart, seier Lindborg.

Ny regel gir meir testing, mindre karantene

Frå 16. august innfører regjeringa ein nasjonal regel om at barn og unge under 18 år ikkje må i smittekarantene, med unnatak av om dei er husstandsmedlemmer eller tilsvarande nære kontaktar til nokon som er smitta. Dette betyr til dømes at dersom ein elev får påvist smitte, må dei andre elevane i klassen testast hyppig over fleire dagar, men dei må ikkje lenger i 10-dagars smittekarantene.

— Dei vidaregåande skulane vil stå for testinga av eigne elevar, i tett samarbeid med kommuneoverlegen i Bjørnafjorden, seier Lindborg.