Gratis HPV-vaksinering held fram
HPV-infeksjon er den vanlegaste seksuelt overførbare infeksjonen i verda og kan i verste fall føra til livmorhalskreft. No held den gratis vaksineringa fram.
Alle kvinner som er fødd i 1991 og seinare fekk frå hausten 2016 tilbod om gratis vaksine mot humant papillomavirus (HPV-vaksine) gjennom eit to-årig vaksinasjonsprogram. I Fusa er helsestasjonen på Fjord`n Senter ansvarleg for dette tilbodet.
Førebygging av livmorhalskreft
Vaksinen vert anbefalt til unge kvinner for å førebyggja livmorhalskreft og forstadium til livmorhalskreft forårsaka av HPV-infeksjon.
Artikkelen held fram under annonsen.
HVP-infeksjonen er som regel ufarleg og går over av seg sjølv, men nokre får ein vedvarande infeksjon som på sikt kan føra til livmorhalskreft.
- Kvart år får om lag 300 kvinner i Noreg livmorhalskreft og 65-100 døyr av sjukdommen. Vaksinen kan gi beskyttelse sjølv om ein har debutert seksuelt, opplyser Fusa kommune på sine heimesider.
Utgangen av 2018
HPV-vaksine har vore ein del av barnevaksinasjonsprogrammet til jenter i 7. klasse sidan 2009.
Tilbodet om gratis vaksine til alle kvinner fødd etter 1991, er mellombels og varer i ein toårsperiode fram til utgangen av 2018. Vaksinasjonen består av tre vaksinedoser gitt i løpet av 6-12 månader.
jostein@osogfusa.no
