Gir seg som senterleiar, prioriterer familien

Etter åtte år som senterleiar sluttar Anne Kristine Tøsdal som senterleiar ved Amfi Os.

Anne Kristine Tøsdal oppgjev omsynet til familien som årsak.

- Eg har alltid kjempa for kvinner i leiarstillingar, så det er med blanda kjensler eg har sagt opp. Men jobben stel diverre for mykje fokus frå familien. Eg har rett og slett lyst til å bruka meir tid på mine born på 9 og 4 år, seier Tøsdal.

Som senterleiar har ho sjeldan kunna leggja frå seg arbeidet på kontoret.

- No ser eg meg om etter ein femti prosent jobb med litt mindre ansvar, seier ho.

Går så det susar

Tøsdal blir verande i stillinga ut oktober. Ny senterleiar er vonaleg tilsett i løpet av august.

- Det vert nok mykje å setja seg inn i, men vedkomande kjem til duk og dekka bord. Amfi Os går så det susar. Eg er stolt av det eg leverer frå meg, seier Tøsdal.