Garanterer regnfri og varm 17. mai
Meteorologen lovar regnfritt vêr og opp mot 20 gradar på 17. mai i Os og Fusa.
Det kan bli ein særs varm nasjonaldag for bunadstunge osingar og fusingar fredag. Ifølgje meteorolog Tone Christien Thaule snakkar me nær sagt om sommarvêr.
– Det blir veldig fint vêr. Kanskje ikkje heilt skyfritt, men i alle høve regnfritt.
Artikkelen held fram under annonsen.
– Det garanterer du?
– Hehe, ja, det trur eg at eg kan garantera.
Varmare og varmare
Dei neste dagane vil temperaturane stiga jamt. 17. mai blir den varmaste i denne perioden.
– Me ser no at den nattlege temperaturen går frå 5 til 8-10 gradar natt til 17. mai, og så reknar me med opp mot 20 gradar på dagen den 17., fortel Thaule.
Også for helga lovar det bra for solhungrige bjørnafjordingar.
– Det blir jamt over fint vêr, kanskje nokre små regnbyger ut på laurdagen, men for det meste opphaldsvêr og ein del sol, lovar meteorologen i Bergen.
kenneth.svenningsen@osogfusa.no
