Frontar handelslivet i lag
Os Sentrumsforening og AMFI Os vil slå eit slag for handelslivet i bygda. I juni kjem dei med felles handelsmagasin.
Fredag føremiddag var det klart at Os Sentrumsforening og AMFI Os vil gå til felles kamp mot handelslekkasjen til Fana og Bergen.
- Veit du ikkje kva dag det er i dag, skjemtar leiar i sentrumsforeningen, Geir Amundsen.
Artikkelen held fram under annonsen.
- Neidå, det er ikkje tull. Senterleiar ved AMFI Os, Silje Lygre, og eg har bestemt oss for å slå eit felles slag for handelslivet i bygda. Første konkrete plan er å laga eit felles handelsmagasin som kjem ut 20. juni, fortel Geir Amundsen.
Flotte fasilitetar
Amundsen legg til at det Lygre som kom opp med ideen.
- Eg synest det var ein knakande god ide. Det er klart me har mykje til felles. Me må visa folk rundt om kring for eit flott handelsliv som finst i bygda, seier Amundsen.
Magasinet vert trykt opp i 16.000 eksemplar.
- Det vert distribuert til heile bygda. Innhaldet vert informasjon om butikkane me har her i Os, sortiment, populære produkt, tilbod og ein del anna. I tillegg vil me laga litt redaksjonelt stoff om fasilitetane elles i Os, fortel Amundsen.
