Ferje og seglbåt kolliderte. Føraren av seglbåten skal ha blåse til over lovleg verdi på alkometeret
Seglbåten gjekk ned etter samanstøyten like utan for Halhjem.
Det opplyser Vest politidistrikt på Twitter.
Vitne på staden i båt bekrefta at seglbåten var gått ned.
Artikkelen held fram under annonsen.
Hovudredningssentralen sør opplyser på telefon til Os & Fusaposten at vedkomande om bord i seglbåten hamna i sjøen, og vart henta opp av ferja.
Vedkomande, ein mann i 70-åra, er frakta til land og vil bli tatt i mot av naudetatane. Meldingane går på at vedkomande er i god fysisk behald.
– Han var åleine ombord. Tilsett av helse. Ikkje meldt alvorleg skadd. Har blåse til over lovleg verdi i alkometer, skriv politiet i ei Twitter-meldinga klokka 22.34.
Vidare vert det opplyst at seglbåten, ifølgje vitne, ikkje skal ha hatt lanterneføring før samanstøyten. Politiet opprettar sak.
– Det pågår ikkje søk etter sakna
Pressekontakt i ferjeselskapet Torghatten Nord, Torkild Torkildsen opplyser at det er ferja «Huftarøy» som har kollidert. Det er ikkje meldt om skadar på ferja.
Det pågår per no ikkje søk etter sakna.
Redningsskøyta er framme på staden, og vil sjå om det er noko å gjera med seglbåten.
Operasjonen vert koordinert av Hovudredningsentralen.
Artikkelen held fram under annonsen.
Vakthavande i Bjørnafjorden brann og redning, Morten Moberg, opplyser at dei var på veg til staden då oppdraget deira vart avbrote.
– Vi vart avbroten ganske kjapt. Vi har fått litt info om det som skjedde. No pakkar vi saman og dreg heim, fortel Moberg.
