Får ikkje delta i valdebatt - skuffa over NRK

Fredag skal H, Ap, Frp, TvS og MDG debattera Os-politikk om bord i NRK Hordalands valferje.- Frustrerande at vi ikkje er inviterte, seier Sveinung Stensletten i Os Venstre.

Leiar i Os Venstre, Sveinung Stensletten, reagerer sterkt på at dei minste partia i kommunen, deriblant hans eige, ikkje er inviterte til å delta i den politiske debatten mellom lokalpolitikarar i Os komande fredag.

- Eg synest det er rart. Vår mann, Jon Sivert Rykkel, sit i formannskapet. Han er ein tydeleg og uttalt utfordrar til ordførarvervet. Og dersom E39 og bru over Bjørnefjorden skal diskuterast, så er det vel ingen det er meir naturleg å ha med enn Os Venstre, seier Stensletten.

Kapasitet

- Kvifor vart berre desse fem partia inviterte, prosjektleiar i NRK Hordaland, Dag Olav Mosevoll?

- Det handlar kort og godt om begrensa kapasitet. Fyrst og fremst plassmangel i ferja, men også talet på mikrofonar og kva som er teknisk mogleg for oss, seier han.

- Vi har invitert dei fire største partia i kvar kommune. For å sikra at dei mindre partia får vera med i nokre av debattane, har vi sett Hordaland under eitt og prøvd å sikra ei jamn fordeling av femteplassen på dei ulike mindre partia frå kommune til kommune. Det betyr at Venstre ikkje er inviterte i Os, men kanskje i ein anna kommune der dei ikkje er blant dei fire største partia, seier Mosevoll.

NRK har basert utveljinga på valresultata frå 2011.

Miljøpartiet De Grønne

- Eit unntak er Miljøpartiet De Grønne som ikkje var inne i det heile teke for fire år sidan, men som ser ut til å koma sterkt i Hordaland.

- Kvifor er MDG inviterte med akkurat i Os?

- Det er litt tilfeldig. Vi har sett Hordaland under eitt og MDG vert med nokre av plassane, seier Mosevoll.

Stensletten slår seg ikkje heilt til ro med svaret.

- Her har NRK late tilfellet rå heller enn å setja seg inn i lokale forhold. Det er frustrerande at NRK heller enn å invitera Venstre, som har site i formannskapet i fire år, vel å invitera MDG som ikkje har ein einaste representant i kommunestyret, sukkar han.

NRK sviktar

Venstre-leiaren antydar vidare at NRK sviktar si rolle som allmennkringkastar.

- Valet av nokre få parti, kan koma til å påverka den naturlege gangen i valkampen.

- Kva meiner du med at dei "påverkar den naturlege gangen"?

- Dersom valferja skal vera rein underhaldning a la Skavlan, er det ikkje så farleg kven dei inviterer eller ikkje.

- Men om det skal vera debattar i folkeopplysningas teneste, er det heilt feil å utelata toneangjevande aktørar. Både NRK og TV 2, har alltid hatt for vane å invitera alle parti som sit i kommunestyre eller eventuelt formannskapet, seier Stensletten.

Største satsing nokon gong

Prosjektleiar Mosevoll er ikkje overraska over reaksjonane frå Os Venstre.

- Sjølvsagt forstår eg frustrasjonen frå dei som ikkje får vera med. Os Venstre er då heller ikkje dei einaste som har reagert.

NRK Hordalands valferje er den største distrikts-satsinga nokon gong i ein valkamp med heile 37 debattar i løpet av nokre få veker.

- Det er fyrste gongen vi gjer eit så stort grep, men for at det skal vere praktisk mogleg, måtte vi gjera nokre tilpassingar. Alternativet ville vera å ikkje gjera det i det heile, seier Mosevoll.