Diskuterte ferjeproblema med fylket

Ordførarar frå fleire kommunar kring Bjørnefjorden lufta i dag situasjonen med kansellerte ferjer og færre ferjeavgangar.

Ferjemøtet som ordførarMarie Bruarøy først ikkje fekk vera med på, og deretter likevel fekk, gjekk av stabelen i dag. Men med Bruarøy på ferie måtte fungerande ordførar Laila Reiertsen steppa inn saman med Atle Kvåle på møtet med Skyss/Fylkeskommunen. Etter møtet kalla dei inn til pressekonferanse framføre rådhuset.

– Det var eit godt møte, der me fekk lufta ut ein del ting. Dei ser situasjonen vår, og tek det på største alvor.

– Det var ikkje noko oppvaskmøte, men ei orientering om status. Me var alle samde om at informasjonen når hendingar oppstår ikkje er godt nok handtert, seier Kvåle. 

Vil straffa seg å kansellera avgangar

I vinter og i vår hadde FosenNamsos fleire uhell med ferjene som førte til kansellerte avgangar, og i framtida vil det bli sanksjonar mot ferjeoperatørar i slike tilfelle.

– Det kjem til å kosta dei dersom dei ikkje leverer i høve til det dei har forplikta seg til. Det blir Skyss/Fylkeskommunen som administrerer gebyret, seier Laila Reiertsen.

– Fekk de noko forklaring på kvifor det har vore så mange uhell?

– Det var mange uheldige faktorar som slo til samstundes. Ein gamal ferjepark er jo ein av dei, seier Atle Kvåle.

Viktig med morgonferje og rush-ferjer

FosenNamsos hadde i forkant av dagens møte vore i dialog med Skyss/Fylkeskommunen om stoda, og ferjeselskapet hadde lagt seg flate på dette punktet. 

Frå 1.1. 2018 overtek Fjord1 fleire ferjesamband i Hordaland – inkludert Hatvik-Venjaneset. Det vart spurt på møtet om reserveferjer framleis blir ivareteke på ein god måte med den nye operatøren, og det vart stadfesta. 

– Kva med tematikken med færre ferjeavgangar ved ny ferjeoperatør?

– Det vart så vidt teke opp. Der blir det dialogmøte med dei involverte kommunane. Det som i alle fall er viktig for Fusa sin del er at 5.35-avgangen blir vidareført og god dekning i rush-tida, seier Atle Kvåle. 

Autopass kan løysa opp køane

Laila Reiertsen seier at kø-problematikken på Halhjem også kan finna si løysing ved at autopass vert innført på ferjesambanda. Dette finst på riksvegferjene alt i dag, men skal også innførast på ferjer som går mellom fylkesvegar.

– Då blir det betaling per bil, og ikkje per passasjer, så det vil lønna seg å køyra med full bil. Men framfor alt vil det vera lettare og raskare å berre kunna køyra rett på ferja, seier Reiertsen og Kvåle.