Dette enda med bruksforbod

Statens vegvesen hadde primært fokus på sikring av last og køyretøy som mangla lys — men det var mykje å ta fatt i.

Onsdag gjennomførte vegvesenet kontroll ved kontrollflata på Hetleflåten.

Dei kontrollerte 43 lette køyretøy, og det var mykje å gripa fatt i. Det blei gitt ut eit bruksforbod i tilfellet ein ser i hovudbiletet i denne saka.

— Lasten på taket var sikra med eit tynt tau. Det er viktig å bruka godkjent sikringsmateriell som er merka med kor mykje det toler, opplyser vegvesenet i ein e-post.

Det blei også gitt ut 12 skriftlege manglar der dei fleste gjekk på manglar ved lys. Eit køyretøy fekk mangel på frontrute grunna steinsprut-skade og sprekk.

Tre personar fekk gebyr for manglande bruk av bilbelte, fire fekk gebyr for manglande medbringa vognkort og det blei gitt ut eitt gebyr for svarte nasjonalmerke på kjennemerke.

— I dagens kontroll hadde vi fokus på køyretøy med hengjar, sikring av last og køyretøy med manglande lys. Dei fleste som blei stoppa med hengjar hadde alt i orden både med lastesikring, lys og det å ha med seg vognkort. Det blei gitt ut eitt bruksforbod på manglande lys på ein hengjar. Ingen av lysa verka, så føraren måtte kopla av hengjaren for så å kjøpa seg eitt sett med nye lys, då det ikkje var mogeleg å få orden på dei som var på hengjaren. Då dette var gjort, kunne hengjaren koplast på og ferda halda fram, opplyser vegvesenet.