Brann i søppelkasse ved Søfteland skule: – Tre ungdomar stakk frå staden

Klokka 20.42 søndag fekk naudetatane i Os melding om at det brann i ein søppelkasse ved Søfteland skule.

Brannvernet rykte ut til skulen, og fekk kontroll over brannen.

– Tre ungdomar skal ha stukke frå staden. Det er mest sannsynleg dei mistenkte, seier politioverbetjent ved Bjørnafjorden lensmannskontor, Anne Lyssand.

Ho legg til at når ein tenner på ein søppelkasse i nærleiken av ein skule, risikerer ein at brannen spreier seg.

– Det kunne fort ha gått gale. Vi tek saka på alvor, og følgjer han opp vidare, påpeikar politioverbetjenten.

– 40–50 bilar «burna» utanfor Lidl-lageret

Vel klokka 18.30 laurdag kveld fekk politiet melding om ei ulukke med ATV i Lønnevågvegen i Nordstrøno. Ein mann tidleg i 20-åra kvelva med ein firehjuling, og fekk foten i klem.

Det er ifølgje Lyssand ikkje mistanke om promillekøyring i samband med ulukka.

– Han bles til 0,0. Førebels er det uklart kva som er årsaka til ulukka, men førarkortet hans vart mellombels inndrege, seier Lyssand.

Seinare på kvelden, i 21-tida, samla det seg ifølgje politioverbetjenten mellom 40 og 50 bilar ved det gamle Lidl-lageret i Ådnadalen.

– Dei dreiv med såkalla «burning». Det føregjekk ein times tid før politiet kom til staden. Vi kjem til å følgja opp hendinga med trafikkansvarleg hjå oss, opplyser Lyssand.

– Ingen køyrde for fort

I 14-tida søndag gjennomførte UP ein trafikkontroll i 50-sona på Hatvikvegen, i retning Fusa. UP var på staden i ein halvtimes tid.

– Det var lite trafikk, og kontrollen resulterte i ingen reaksjonar.

Måndag morgon, kring klokka 09.15, kom det melding om ein båt ved ferjekaien på Halhjem som tek inn vatn.

– Det er vegvesenet som har ansvaret for slikt. På noverande tidspunkt er eg litt usikker på kva dei føretek seg, er meldinga frå politiet i Os.